50-Anyos Nga Ginang Nadakpan Sa Buy Bust

CEBU Philippines - Usa ka 50-anyos nga babayeng suspetsadong pusher og shabu ang nagtingkagol sa Talisay City detention cell human masikop sa gipahigayong buy bust operation sa kapolisan kagahapon sa buntag diha sa barangay Tanke sa nahisgutang siyudad.

Ang suspetsado mao si Marissa Obrero alyas “Nanay” residente sa nahisgutang lugar nakuhaan og usa ka medium nga paketeng shabu atol sa operasyon.

Ang maong operasyon gipahigayon nila ni Senior Inspector Marlon Gumabao, PO3 Rey Bucao, PO3 Benedicto Lasque, PO2 Narciso Alforque, PO2 Roy Lofranco ug PO1 Euwen Pitogo.

Si Nanay nga nahinabi sa Banat News mibutyag nga mao na kini ang ikaduhang higayon nga siya nadakpan may kalambigitan sa ilegal nga drugas, una niadtong 2005 apan nakapiyansa siya ug na-acquitted sa Korte sa maong kaso.

Gibutyag usab ni Nanay nga nagsugod siya sa mao niyang ilegal nga kalihukan dihang nagpanuigon pa siya og 35-anyos, ang iyang supplier kaniadto napriso na usab karon.

Apan sa iyang pagkadakop karon gihimakak niya kini tungod kay human madakpi ang iyang usa ka anak niadtong milabay’ng tuig gumikan gihapon sa drug pushing miadto siya sa Bohol ug miatiman sa ilang panagatan ug nabalik lang siya nganhi sa Sugbo niadtong Hunyo 3, 2010.

Miangkon si Nanay nga niadtong tuig 2007 ang iyang anak nga si Lloyd Obrero, 27, nadakpan sa mga polis sa mao gihapong kalapasan, laing anak ni Nanay nga si Maridel Obrero, 24, nadakpan sa mao gihapong kalapasan niadtong tuig 2009 nga matud pa niya pulos tumotumo.

Si Nanay mag-atubang og kasong kalapasan sa Akta Republika 9165 nga gikatakdang ipasaka batok kaniya karong adlawa (Lunes) diha sa Talisay City Prosecutor’s Office. (Brenda Batuto) (BANAT NEWS)