CEBU Philippines - Patay ang duha ka lalaki human gipaulanan og bala sa wala mailhing mga lalaki samtang ang duha nangihi pasado alas-2 kagahapon sa kaadlawon diha sa barangay Balirong syudad sa Naga.
Ang mga biktima nailhan nga sila Noe Tapaso Omambac, 24, usa ka checker sa Apo Cement ug molupyo sa barangay Lanas ug Geraldo Niño Abalorio, 26. Base sa imbestigasyon sa kapolisan nasayran nga ang duha ka biktima nagbaklay patubang sa ilang panimalay kuyog sa usa ka Michael Canillo, 19, molupyo sa barangay Uling.
Apan sa ilang pag-abot sa usa ka eskina sa Naga-Uling Road padulong sa dakbayan sa Toledo ang duha ka biktima nga sila si Omambac ug Abalorio mihunong sa paglakaw ug mipahipi sa daplin aron mangihi.
Si Canillo miuna og lakaw apan wala pa kini kaayo makapalayo kalit siyang nakadungog og mga buto sa armas ug mao nalay iyang nakit-an sa iyang paglingi nahagba na si Omambac.
Tungod niini dali siyang midagan padulong sa buhatan sa kapolisan ug wala pa kaayo siya makalayo nakadungog na usab siya og laing buto sa armas.
Sa pagresponde sa kapolisan sa lugar wala na nila maabti ang mga mamumuno samtang ang duha ka biktima nagbuy-od nalang diha sa dalan apan dali nilang gidala sa Minglanilla District Hospital apan gideklarar silang dead on arrival.
Nasayran nga si Omambac nakaangkon og samad pinusilan sa iyang tangkugo nga milapos ngadto sa iyang agtang samtang si Abalorio nakaangkon usab og samad pinusilan sa iyang dughan ug nilapos sa iyang likod.
Sa pakighinabi sa Banat News kang PO2 Ken Cabrera kini mibutyag nga ang ilang intelligence group mipahigayon pa og pakisusi kun unsa gayud ang motibo sa pagpusil kini tungod kay base sa ilang nakuhang impormasyon walay kontra ang duha ka biktima. (Lesley Caminade) (BANAT NEWS)