Barangay kapitan nakuhaa'g mga armas

CEBU, Philippines - Barangay kapitan sa barangay Mayana lungsod sa Barili gidakop human makuhai og mga armas sulod sa iyang panimalay pasado alas-6 sa buntag sa gipahigayon nga operasyon sa Criminal Investigation and Detection Unit.

Ang kapolisan armado og search warrant gikan ni Regional Trial Court Branch 10 Presiding Judge Soliver Peras ug gi-serve kini ngadto sa panimalay ni Kapitan Jonas Binondo.

Ang CIDG nakadawat og impormasyon kalabot sa gikatahong pagpunay og dala-dala og armas sa kapitan ug gani adunay higayon nga adunay nakakita ngadto kaniya nga nagtak-in og armas.

Tungod niini, mikuha og search warrant ang CIDG-7 sa korte hinungdan sa gilusad nga operasyon batok sa maong kapitan.

Atol sa pagsiksik sa balay sa kapitan, nakuha diha sa iyang balay ang usa ka kalibre .45, usa ka 12-gauge shotgun, usa ka .357 rebolber, duha ka magazine sa kalibre .45, 18 ka buhing bala sa kalibre .45, tulo ka buhing bala sa kalibre .357, upat ka buhing bala sa shotgun, usa ka holster nga itom sa kalibre .45, usa ka holster usab alang sa kalibre .357 ug napulo ka kabhang sa kalibre. 45.

Hinuon ang kapitan nakapakita og Memorandum Receipt (MR) nga pirmado sa munisipyo alang sa kalibre .45 ug sa shotgun.

Samtang giklaro sa kapitan nga dili iya ang kalibre.357 rebolber tungod kay iya kini sa iyang bayaw nga igo lang gibilin ngadto sa ilang panimalay.

Apan bisan paman og gihimakak sa kapitan gisikop lang gihapon siya sa kapolisan kini tungod kay nakuha man ang maong mga ebidensya sa iyang panimalay nga walay lisensya.

Tungod niini kasong kalapasan sa paghupot og armas mao karun ang atubangon sa kapitan.

Ang kapitana nagdudang adunay kalambigitan sa politika ang pagsikop kaniya.

Kasamtangan karun nga nabalhog sa karsel sa CIDG ang kapitan samtang ugmang adlawa gikatakdang pasakaan kini og kaso. (BANAT NEWS)