CEBU, Philippines - Angayang moabag ang katawhan sa kampanya batok sa rabies nga gikan sa iro ug iring, matud pa ni Dr. Alice Utlang , ang City Veterinarian.
Matud pa ni Utlang nga ang Department of Veterinary Medicine and Fisheries (DVMF) ning dakbayan walay puas sa pagsabwag sa maong kampanya aron kalikayan ang dugang mangamatary gumikan sa rabies.
Matud pa ni Utlang nga segun sa nahipos nilang listahan, mikabat ra sa 2, 486 ang mga binuhing iro dinhi sa dakbayan diin ang barangay nga may labing daghan og iro mao ang Barangay Guadalupe.
Nagkanayon si Utlang nga seryoso sila sa ilang kampanya busa nakig-alayon sila sa mga opisyal sa barangay aron motabang ning maong kampanya.
Busa iyang giawhag ang mga nanag-iya og iro nga ilang iparehistro ang ilang mga binuhi aron mahibaw-an ang populasyon niini.
Matud pa ni Utlang nga magpadayon gihapon ang ilang house-to- house campaign sa nagkadaiyang barangay sa dakbayan.
Dugang serbisyo nga gidalit sa DVMF mao ang pagkapon sa mga iro nga laki ug pag- ligate sa mga babayeng iro aron maminosan na ang populasyon niini.
Nasayran nga kadtong namuhi og iro nga wala moparehistro sa ilang binuhi ug wala usab magpabakuna niini, kaluwatan sila og warning sa DVMF ug hatagan lamang sila og lima ka adlaw sa pagsanong niini, ug ang kapakyas nila sa pagtubag kapahamtangan sila og silot nga pagbayad og multa subay sa gilagda sa ordinansa ning dakbayan.
Nasayran nga si Konsehal Ronald Cuenco sa amihanang bahin sa siyudad misaad nga moduso og ordinansa nga hingusgan ang pagmando sa tanang namuhi og hayop sa pagpabakuna niini og anti-rabies vaccine. (BANAT NEWS)