CEBU, Philippines - Usa ka tindahan ang nasunog, apan nakakuha kini sa atensyon sa kabomberuhan ug sa kapolisan gumikan kay ang tag-iya niini kabanay sa lalaking gipusil ug gidakdakan og batok sa tulo ka magsuon usa ka semana na ang nakalabay.
Ang sunog nahitabo diha sa sitio Toril, sa barangay Canjulao dakbayan sa Lapulapu kagahapon sa kaadlawon diin usa ka tindahang gipanag-iya ni Pedro Pebida Sr. ang giingong gituyo sa pagsunog.
Sa pakighinabi sa Banat News kang Pebida kini diretsong mipadayag nga gituyo og sunog ang iyang tindahan ug posibleng konektado kini sa nahitabong krimen sayo niining semanaha.
Ang tulo niya ka paryente nga managsuong sila si Pedro Pebida Jr., Pedro Pebida III ug Patricio Pebida nga iyang kabanay maoy gitumbok nga mipatay sa lain usab nilang paryente nga si Paul Dico ug higala niining si Rapunsil Dungog.
Gitug-an ni Pebida nga nanimahong gas ang palibot sa iyang panimalay ug nagdudang maoy sunod nga sunogon apan wala mahinayon gumikan kay daling nakamata ang mga silingan sa pagkasunog palang sa iyang tindahan.
Sumala pang Pebida nga sa wala pa mahitabo ang pagkasunog sa iyang tindahan nakadawat siya og hulga nga adunay mahitabo kanila gumikan sa kamatayon ni Dico ug Dungog.
Giingong apil sa nadawat niyang hulga mao ang bahad nga sunogon ang ilang propiyedad.
Ang alegasyon ni Pebida maoy sentro karon sa imbestigasyon sa kabomberohan ug sa kapolisan. Samtang si FO1 Climaco Salisid ang imbestigador sa Lapulapu City Fire Department mibutyag nga P5 mil lamang ang danyos sa maong sunog ug gipaubos kini sa 1st alarm. (BANAT NEWS)