CEBU, Philippines - Nagtingkagol sa Talisay City detention cell ang usa ka babaye kinsa giingong mitunol og ginadiling drugas kaniadto sa iyang bayaw nga napriso tungod sa kasong pagpatay diha sa maong prisohan.
Si PO2 Roy Lofranco sa Talisay City Police Station sa pakighinabi niini sa Banat News mibutyag nga si Marites Salibay, hingkod, taga barangay Tanke, sa maong dakbayan napasakaan kaniadto og kaso sa paglapas sa balaod bahin sa paghupot og ginadiling drugas.
Kini sa dihang mikuyog si Salibay sa iyang igsuon nga miduaw sa bana niining napriso tungod sa kasong pagpatay unya nasakpan kining mipalusot og usa ka paketeng shabu nga giputos og kuwarta ngadto sa maong piniriso.
Ang nakasakop mao ang jailguard nga babaye nga nagbantay sa prisohan diha sa barangay Poblacion, sa maong dakbayan kinsa maoy mihiling sa kuwartang gitunol ni Salibay ngadto sa iyang bayaw.
Dihadiha gipasakaan dayon siya og kaso, apan gumikan kay matag bista dili siya motunga, nakonbikto siya ug gisentensiyahang mabilanggo sulod sa duha ka tuig ug duha ka buwan sa Regional Trial Court (RTC).
Si RTC Judge Soliver Peras sa branch 10, miluwat og warrant of arrest batok kang Salibay niadtong Hulyo 12, 2010 nga gisilbi nila ni Lofranco, PO3 Rey Bucao ug PO3 Benedicto Lasque nga maoy misikop kang Salibay. (BANAT NEWS)