P50mil sa amo gikawat sa maid
CEBU, Philippines - Nasakiyo sa usa ka katabang sa balay ang P50,000 ug mga ATM card sa iyang amo nga nagpuyo sa dalan Violado, BC Homes, barangay Lahug, dakbayan sa Sugbo sa miaging buntag.
Ang biktima mao si Azucena Eamiguel ,68, samtang ang suspetsado mao usab si Celia B. Muños,26 , ug katabang sa biktima nga taga Marigondon Beach ,dakbayan sa Lapu-lapu.
Base sa pasiunang imbestigasyon sa kapolisan, nasuta nga ang maong suspetsado tulo pa lang ka-adlaw nga nanarbaho sa balay sa biktima.
Apan niadtong Huwebes sa buntag nahibulong na lang ang biktima dihang sa iyang pagmata nahanaw na ang iyang pitaka nga gisudlan sa P50,000 cash, mga ATM card, mga importanteng papeles ug mga ID.
Misamot ang iyang kabalaka dihang wala na usab niya makita ang iyang katabang. Busa iya nalang gisumbong sa kapolisan ang nahitabo ug sa pagkakaron gipangita na ang suspetsado. (BANATNEWS)
- Latest
- Trending
