2 bata nangilog armas, namusil

CEBU, Philippines - Nasikop sa kapolisan ang duha ka minor de edad nga mga lalaki nga responsable sa pagpangilog og armas sa usa ka lady guard ug pagpamusil sa karibal nga gang sa barangay Mactan, dakbayan sa Lapulapu sa milabay’ng hapon.

Ang nasikop mao ang usa ka 16 ug 17-anyos nga lalaki nga mga residente sa samang dapit. Samtang ang tulo ka kauban niini hangtod karon gawasnon pa ug nagtagotago.

Sa imbestigasyon sa kapolisan, nasayran nga ang mga nasikop maoy nalambigit sa pagkulata ug pag-ilog sa armas sa usa ka babayeng security guard nga si Lourdes Tagalog ug pagpamusil niadtong milabay’ng Sabado didto sa sitio Dapdap barangay Mactan nga mibilin og usa nga samaran nga nailang si Jasper Empas, 19, residente sa maong dapit.

Ang duha positibong giila sa mga biktima hinungdan nga gipaubos kini sa kustodiya sa kapolisan.

Nasayran sa kapolisan nga ang mitug-an sa kalambigitan sa duha ka minor de edad mao ang mga sakop sa magkaribal nga gang.

Samtang ang usa ka hinungdan nga mitug-an ang mga batan-on kun kinsa ang namusil ni Empas gumikan kay ang usa ka suspek karibal kini sa paghigugma sa uyab ni Empas.

Samtang si Tagalog mapasalamaton sa kapolisan sa pagkasikop sa mga minor de edad aron iyang makuha pagbalik ang iyang armas nga giilog gikan kaniya atol sa iyang pag-duty ug mauli kini ngadto sa iyang security agency nga gialagaran. (BANATNEWS)