Batang drayber sa piskal, lain 2 maoy gikasuhan

CEBU, Philippines - Gipasaka na kagahapon sa hapon diha sa Talisay City Prosecutors Office ang kasong robbery with homicide batok sa mga suspetsadong mipatay ni kanhi Regional State Prosecutor Hernando Masangkay.

Si Supt. Henry Biñas sa pakighinabi niini sa Banat News mibutyag nga ang menor de edad nga giingong drayber sa biktima ug duha ka wala mailhing lalaki nga nakit-an diha sa balay ni Masangkay niadtong wala pa kini patya nianang Hunyo 25, 2010 ang gipasakaan og kasong robbery with homicide.

Kahinumduman nga ang kapolisan misentro kabahin sa personal nga hinungdan sa pagpatay ni Masangkay apan hinuon si Biñas wala mosalikway sa uban pang mga anggulo sa nahisgutang krimen.

Ang anak ni Masangkay nga si Regie maoy mikompirmar ngadto sa mga polis nga nawagtang ang gold nga kwentas ug mahalong relo sa ilahang amahan.

Si Biñas mibutyag usab nga circumstancial evidence ang ilahang gibasehan sa pagduso sa kaso sama sa fingerprints, video nga nakuha sa CCTV cam sa usa ka mall sa dakbayan sa Sugbo diin nianang hapon niadtong Hunyo 25, 2010 nakita sa video ang menor nga drayber ug si Masangkay nagsunod og kanaog sa hagdan paingon ngadto sa paradahan sa sakyanan.

Kahinumduman nga ang ticket sa lotto nga napalit ni Masangkay niadtong Hunyo 25, 2010 sa hapon sa outlet nga nahimutang diha sa maong mall maoy usa sa nakahatag og kahayag sa pagpalawom sa mga polis sa ilang imbestigasyon.

Ang nahisgutang menor nangangkon nga mitambong siya sa iyang klase dihang nahitabo ang insidente sa pagpatay kang Masangkay apan sa gipahigayong imbestigasyon ni PO2 Jundave David nasutang absent ang maong bata nianang higayona. (BANATNEWS)