CEBU, Philippines - Naangol ang pito ka mga tawo nga naglakip sa lima ka empleyado sa Mactan Export Processing Zone dihang ang multicab nga ilang gisakyan nadasmagan og laing jeep pasahero diha sa barangay Ibo dakbayan sa Lapulapu kagahapon sa buntag. Ang mga biktima mao sila si Gerson Gulani, 25, residente sa dakbayan sa Mandaue, Brenda Cañete sa dakbayan sa Lapulapu, Lilia Savior, Ma. Lucia Jubanal ug mga empleyado sa MEPZ 1.
Lakip sa samaran mao ang drayber sa multicab nga si Mario Cataluna ug ang driver sa nakadasmag kanila nga si Celso Josol.
Matud pa ni Cataluna padulong sila sa Punta Engaño diin kalit lang misugat kanila ang PUJ gikan sa pikas dalan hinungdan nga sila nagkadinasmagay.
Si Josol mitug-an nga nabali ang ball joint sa atubangang ligid sa iyang sakyanan hinungdan nga kalit kining mitabok sa laing dalan ug mibangga ngadto sa de-pasaheroang multicab.
Kasamtangang gitanggong sa kapolisan sa MEPZ si Josol ug posibleng pasakaan kini og kasong “reckless imprudence resulting to multiple physical injuries” samtang nagpaalim pa sa tambalanan ang pito. - BANAT NEWS