CEBU, Philippines - Legal ang paglingkod ni kanhi Department of Tourism Regional Director Patricia Aurora Roa sa Mactan-Cebu International Airport Authority gumikan kay nagsubay kini sa ilang charter ug rekomendado kini sa ilang labaw ug sa Presidente sa nasud.
Atol sa usa ka press conference nga gipatawag sa board kagahapon sa buntag uban si Cebu Gob. Gwendolyn Garcia mipasabot sa media nga legal ang paglingkod ni Roa sa board diin sulod na sa 15 ka tuig nga pagserbisyo niini.
Ang paglingkod ni Roa adunay pagtugot sa lima ka mga nangaging Department of Trade and Commerce secretaries ug tulo ka mga milabay’ng presidente ug dili kini angayan nga ibasol ngadto sa board ang paglingkod ni Roa kundili ang kanhing mga administrasyon nga naghatag og pagtugot niini.
Sa nasayran sa Banat News nga ang board adunay 11 ka mga miyembro ug ang tsirman mao ang DOTC secretary, Vice Chairman sa MCIAA General Manager, upat niini ang gikan sa pribadong sector samtang ang uban gikan sa DOT, DOJ, DOF diin ang mga Secretary o Under Secretary lamang maoy molingkod isip ex-officio member sa board.
Apan sa kaso ni Roa gihatagan kini og pagtugot sa iyang mga labaw ug sa mga miaging presidente sa nasud maong wala silay katungod sa pagsupak niini.
Ang paghatag og “retirement benefits” ngadto ni Roa balor 500 mil ka pesos matud pang Garcia nagsubay sa ensaktong proseso ug mismong ang upat ka mga board members sa pribadong sektor maoy miduso sa maong resolusyon ngadto sa board.
Human sa hiniusang hukom sa board nga angayan hatagan si Roa sa iyang retirement benefit sa legal nga pamaagi.
Dili usab mabutang sa “double compensation” ang madawat nga benepisyo ni Roa gikan sa MCIAA gumikan kay lahi ang iyang tahas isip Regional Director sa DOT ug sa iyang trabaho pagkamiyembro sa MCIAA board. Matud pa ni Garcia kung iuli ni Roa ang P500 mil base sa mando sa Ombudsman Visayas, ila unang tun-an og maayo sa board kung angayan ba kini nila dawaton. - BANAT NEWS