'Protektor' sa tulisan

CEBU, Philippines - Tulo ka mga barangay tanod sa Carreta gipasanginlang maoy protektor sa mga tulisang minor nga nalambigit sa mga pagpanulis sa maong barangay ug kasikbit nga lugar.

Kini human usa sa duha ka menor de edad nga pulos sakop sa gang nga mitulis og jeep pasaheroan apan nangadakpan pasado alas-9 sa miaging gabii sa sitio Mahayahay sa barangay Mabolo ning dakbayan mitug-an sa mga tigbalita kabahin sa gihimo sa maong mga tanod.

Ang nasikop nagpangidaron og 16-anyos ug 14-anyos nga pulos molupyo sa barangay Carreta samtang laing tulisan nga kauban sa duha ang nakaikyas. Sa pakighinabi sa Banat News sa hepe sa Theft and Robbery Section (TRS) Sr. Insp. Bonifacio Garciano ang tulo misuway og tulis sa unom ka pasahero sa jeep de pasaheroang ilang gisakyan gikan sa Mabolo.

Matud pa ni Garciano kalit lang nanion ang usa kanila ngadto sa mga pasahero ug mideklarar og holdap, tungod sa kahadlok sa mga pasahero wala na sila mosukol ug gihimulbolan sila sa ilang mga butang.

Pag-abot diha sa Upper Carreta daling nanganaog ug mikaratil og dagan ang tulo padulong sa Chinese Cemetery, apan naabtan sila sa mirespondeng Special Operation Group ug Mobile Patrol Group.

Nakuha gikan sa 16-anyos ang usa ka kalibre sa .38 rebolber nga adunay duha ka buhing bala, samtang nakuha usab ang mga pitaka, duha ka cellphone nga gituohang gipanag-iya sa pasahero sa jeep.

Sa pakighinabi sa mga tigbalita sa 16-anyos nga suspek mibutyag nga adunay nagpaluyo kanilang mga tanod sa barangay Carreta, matud pa niini nga senyasan sila sa mga tanod pinaagi sa flashlights kun adunay hot pursuit operation diha sa dapit sa ilang gitagoan hinungdan nga makabantay na sila og makaikyas.

Apan ang maong kasabutan dili libre gumikan kay mangayo og bahin ang mga tanod ug mipasangil nga ilaha pa usab kining ‘pasuyupon.’

Ang Banat News mipugong una sa pangalan sa tulo ka mga gipanganlang mga tanod samtang wala pa kakuhai sa ilang habig bahin sa alegasyon sa maong suspek.

Si Garciano sa iyang bahin human masayod sa rebelasyon sa maong suspek miingon nga iyang pakigkitaan ang barangay kapitan sa Carreta aron sutaon kun aduna bay kamatuoran ang alegasyon niini.

Samtang isugyot ni Garciano nga ipa-drug test ang tulo ka mga barangay tanod nga gihinganlan sa 16-anyos ug ilaha usab silang imbitahon.

“Bantog ra diay nga dili namo masakpan nang mga esnatser sa Carreta kay ang mga tanod maoy mo-senyas nga naa nay mga polis,” matud pa ni PO2 Pompie Tañajura Jr. nga sakop sa TRS. - Ug uban sa report ni Cherlie Domecillo (BANAT NEWS)