Indian naningil gisukmag

CEBU, Philippines -  Nakaangkon og gisi sa walang bahin sa nawong ubos sa iyang kilay ang usa ka Indian national human kini sukmaga sa usa ka lalaki nga iyang gipaninglan sa utang niadtong Miyerkules sa gabii diha sa barangay Cansojong, dakbayan sa Talisay.

Ang biktima mao si Raj Kumar, 34, Indian national, negosyante ug temporaryong nagpuyo diha sa lugar.

Ang suspetsado nga si Joel Lombrino, taga sitio Dapdap, barangay Pooc, Talisay drayber og habal-habal temporaryong nadetenir sa Talisay City detention cell human masikop nila ni SPO1 Ricardo Balbutin, PO1 Euwen Pitogo ug PO1 Rusty Pelayo.

Si Kumar mianha sa Talisay City Police Station sa barangay Poblacion ug nangayo og panabang ngadto sa mga polis.

Si Kumar naningil ngadto kang Lombrino sa utang niini apan nasuko ang naulahi tungod kay walay kwartang ikabayad ug gisukmag hinuon ang biktima.

Apan si Lombrino nga nahinabi sa Banat News kagahapon mibutyag nga ang iyang inahan maoy nakautang kang Kumar og P1,000.

Matud ni Lombrino nga P20 kada adlaw ang data sa maong utang diin kuwang na lang og kapin sa P500 ang iyang inahan.

Apan dili kanunay’ng magkaabot ang iyang inahan ug si Kumar hinungdan nga usahay matingob ang data ug usahay siya maoy motapal na lang og bayad tungod kay siya man maoy paninglon ni Kumar kung makit-an siya niini.

Si Lombrino mibutyag usab nga niadtong higayona nga naningil ngadto kaniya si Kumar wala siya’y kwarta. Si Lombrino mipasangil nga ang Indian national nasuko kay iyang gibalibaran ug gitukmod-tukmod siya niini hinungdan nga wala na siya makaagwanta ug iya na hinuon kining nasukmagan.

Kagahapon sayo sa buntag si Kumar mianha sa police station ug mipahibawo sa polis nga dili na siya mopasaka og kaso ngadto kang Lombrino basta bayaran lang siya niini og P1,000 sa iyang gasto sa pagpatambal sa iyang bun-og. – BANAT NEWS