CEBU, Philippines - Gipasidunggan sa Philippine National Police sa Camp Crame ang Lapulapu City Police Office isip “Best Police Station” nga misanong sa pagpreserbar sa kalikupan.
Si SPO1 Rodito Viovicente nga sakop sa Police Community Relations sa LCPO nga maoy midawat sa maong pasidungog niadtong Hulyo 5 mipadayag sa iyang kalipay human ang kadagkoan sa PNP miila sa kalihukan sa PCR sa Lapulapu pagpreserbar sa kinaiyahan ilabi na ilawom sa kadagatan.
Ang pasidungog naggumikan sa sunodsunod nga pag-rescue sa LCPO PCR sa mga endangered marine species, underwater clean up uban sa 41 ka mga sakop sa Scubasurero, ang Lapulapu Police Trained Divers, mangrove planting ug feeding program sa kabarangayan sa isla sa Olango.
Si PNP Chief Director General Jesus Versoza maoy mitunol sa pasidungog atol sa pagsaulog sa ika-15 nga PCR Month nga nagdala sa temang “Matatag na Pagkakaisa sa Pambansang Pulisiya at Mamayan Tungo sa Kapayapaan at Kaunlaran.”
Gumikan niini, si LCPO director Sr. Supt. Mariano Natu-el Jr. mipadayag nga misamot ang ilang tinguha pagpadayon sa mga kalihukan pagpreserbar sa kalikupan dili lamang sa kadagatan apan lakip usab sa palibot sa dakbayan sa Lapulapu.
Ang hepe sa PCR sa Lapulapu nga si Sr. Insp. Ma. Aurora Rayos mipahibalo nga daghan pa’ng mga kalihukan ang ilang himuon nunot sa pagsaulog sa PCR month. - BANAT NEWS