'Bayot,' bata gipamusil; usa patay

CEBU, Philippines - Patay ang wala mailhing gituohang mahuyang samtang samdan ang usa ka 15-anyos nga batang babaye human sila gipamusil sa usa ka lalaki pasado alas-2 sa kaadlawon sa sitio Kawit barangay Ermita.

Ang biktima gibanabanang nagpangidaron og 40-anyos, tabunon ang pamanit, kasarangan ang panglawas ug medyo opawon, adunay gitas-on nga 5’ 8” ug nagsuot og blue shorts.

Ang suspek nga nasikop dayon human sa hitabo giilang si Charlito Empenado, 27, taga Proper Ermita sa samang barangay.

Giingong nagbaklay sa nahisgutang lugar dihang kalit mibutho ang  wala mailhing tawo ug sa walay igong hinungdan kalit mipusil kaniya.

Ang biktima naigo sa tuong parte sa lawas ug milapos ngadto sa walang kilid, usa ka 15-anyos nga batang babayeng mipalit og burger sa usa ka fastfood stalls napagan sa bala diha sa ulo.

Ang duha gidala sa Cebu City Medical Center apan namatay ang lalaki samtang talandugon ang bata.

Sa pakighinabhi sa Banat News ni SPO4 Alex Dacua mibutyag nga personal nga panagbangi maoy hinungdan sa pagpamusil. – BANAT NEWS