CEBU, Philippines - Patay ang usa ka 29-anyos nga lalaki human nasablay sa linya sa kuryente ang palwa sa lubi nga iyang gisak-an hinungdan sa iyang pagkakuryente ug pagkatagak diha sa barangay Macaas lungsod sa Catmon niadtong Lunes sa alas 3:30 sa hapon.
Ang namatay mao si Epifanio Colonia Jr., molupyo sa maong lugar.
Matud ni PO2 Ben Navales sa Catmon Police dihang nahinabi sa Banat News ang biktima nanguha og lukay nga i-atop sa gitukod niining payag.
Apan mao nalay nabantayan sa asawa niini ug anak nga lagubo diha sa ubos sa gikatkatan ni Colonia ug dihang ilang gisusi naa na kini sa ubos ug naangol.
Dali nilang gidala si Colonia sa Juan Dosado Memorial Hospital sa lungsod sa Sogod gumikan kay nawad-an kini sa panimuot apan gideklarar sa mga doktor nga dead on arrival.
Subay sa gihimong pakisusi gituohang ang biktima nakuryentihan human misablay ang palwa sa lubi nga iyang gisak-an sa mainline sa Cebu Electric Cooperative hinungdan sa pagkatagak niini. - Darrel Carumba ug Romeo Limpangog (BANAT NEWS)