Benepisyo ni Roa maisip nga 'double compensation'

CEBU, Philippines - Ang kanhi General Manager sa Mactan Cebu International Airport Authority kon MCIAA nga si Alfonso Alerre mihulagway nga matawag nang ‘double compensation’ ang gihatag sa Mactan-Cebu International Airport Authority Board nga P500 mil isip severance benefits kang kanhi Department of Tourism regional director Patricia Dawny Roa.

Matud pa ni Alerre nga sa pagretiro ni Roa sa DOT makadawat kini og labing minus usa ka milyon ka pesos nga retirement fee, maong dili na gyud unta angayan pang makadawat og dugang benepisyo si Roa sa iyang pagretiro isip miyembro sa MCIAA Board.

Matud pa ni Alerre sa interbyu sa DyRF nga dihang mi-retire siya sa katungdanan isip general manager sa MCIAA wala gyud siya makadawat og separation fee gikan sa MCIAA Board.

Si Alerre wala hinuon moisip nga ilegal ang paghatag sa board og P500 mil apan dili kini angay sanglit usa man usab ka government official si Roa.

Sama sa baruganan sa Ombudsman, si Alerre mitambag sa board nga bawion una ang maong kwarta o ba kaha si Roa na mismo mouli niini ug ibalik lang sa paghatag kun maklaro na ang legalidad niini subay sa Commission on Audit. – BANAT NEWS