RMG trainees naigo sa kilat

CEBU, Philippines - Napulo ug walo ka trainees sa Regional Mobile Group (RMG)-7 ang naigo sa kilat kagahapon sa udto sa sitio Camansile barangay Lamakan nga bukirong barangay gibana-banang lima ka kilometro gikan sa Poblacion sa lungsod sa Sibonga.

Si Sr. Supt. Rey Lyndon Lawas, training director sa RMG-7 nga nahinabi sa Banat News kagahapon miingon nga ang shotgun nga giisyu kang PO1 Aidrin Laurente maoy gidakop sa kilat.

Si Laurente matud pang Lawas maoy mi-absorb sa electric shock ug gani dihang ilang naabtan ‘shocked’ pa kini ug dili makasulti samtang laing duha ka polis ang nangasamdan sa mga ulo.

Adunay 321 ka trainees nga mipailawom sa Special Counter-Insurgency Training ug 18 kanila maoy gipadala sa maong barangay alang sa lima ka adlaw nga pagbansay-bansay.

Ang ubang nahiagom og electrical shock nga nalakip nila ni PO1 Marjuel Molina, PO1 Edward Gonzales, PO1 Edmund Sumalinog, PO1 Norman Luage, PO1 Leah Seraña, PO1 Obdulia Baring, PO1 Erick Diamante, PO1 Geoffrey Aparece, PO1 Junrey Garigade, PO1 Richard Cabat-bat, PO1 Barry Entea, PO1 Benedicto Ejan, PO1 Darryl Mark Biolangco, PO1 Cesar Gaboie, PO1 Rey Dur Duran, PO1 Silvano Bascones ug PO1 Galarce.

Ang grupo kasamtangang naniudto tunga-tunga sa pagbunok sa uwan nga kabahin sa ilang training dihang aksidenteng mikilat ug gidakop ang shotgun ni Llorente.

Si Lawas human makadawat sa report daling miadto sa dapit luwan sa ilang pickup ug gidala ang mga polis sa tambalanan.

Si Chief Supt. Lani-O Nerez, director sa Police Regional Office-7 mibisita sa mga nangaangol diha sa South General Hospital miingon nga abagahon sa PRO-7 ang galastuhan.

Tungod sa maong hitabo, gisuspenso ni Nerez ang field training exercise kagahapong adlawa. – BANAT NEWS