CEBU, Philippines - Usa ka kawani sa Information Technology (IT) gidakop sa mga sakop sa National Bureau of Investigation (NBI) kagahapon sa buntag didto sa Osmeña Boulevard sa kasong pangawat.
Ang nasikop mao si Mark Siarot, usa ka computer programmer sa IT kinsa nasikop pinaagi sa warrant of arrest nga giluwat ni Judge Silva Aguirre Paderanga.
Kauban niyang nadakpan mao ang iyang mga kauban nga sila si Joevany Estremera, Ryan E. Lagbo ug si Germar Anthony Martinez.
Nasayran gikan ni NBI agent Reynan Oliva, kinsa maoy misikop sa mga suspetsado nga ang mga dinakpan, gipasanginlang nangawat og salapi gikan sa Henry Lhuillier Western Union nga mokabat og P2.7 milyones sukad niadtong Hulyo hangtod Agosto 2008.
Kasong estafa ang gisang-at batok sa mga suspetsado ug si Siarot ray nabalhog sa prisohan kay nakapiyansa sila si Estremera, Lagbo ug Martinez. – BANAT NEWS