Mitubag sa sugo sa lawas gipusil patay

CEBU, Philippines - Gipusil patay ang usa ka mag-uuma nga migawas sa iyang pinuy-anan aron sa pagtuman sa sugo sa lawas diha sa bukirang bahin sa barangay Saksak lungsod sa Consolacion kagahapon sa alas 5:30 sa buntag.

Ang biktima mao si Rodulfo Mendaros Gerona, 66, minyo, usa ka mag-uuma ug molupyo sa maong lugar, samtang ang responsable wala pa matumbok sa kapulisan sa paghimo ning balita.

Matud ni PO3 Allen Garciano sa Consolacion Police Station dihang nahinabi sa Banat News subay sa imbestigasyon ang biktima migawas sa balay ug miadto sa kalibunan aron sa pagtuman sa sugo sa lawas.

Apan sa iyang pagbalik sa balay miusig og maayo ang mga iro ug uwahi na niya mabantayi ang usa ka lalaking nagkalo ug mipusil kaniya sa dughan.

Ang maong lalaki daling miikyas ug wala na hikit-i sa mga nakamatang mga kabanay ug silingan. Ang biktima daling gidala sa tambalanan apan gideklarar kini sa mga doktor nga dead on arrival.

Subay sa gihimong pagsukit-sukit sa kapulisan sa asawa niini wala gyud kini makaila sa panagway sa mamumuno tungod kay gawas nga dili pa kaayo hayag niadtong tungura nagkawo usab kini.

Ang kapulisan padayon pa sa ilang manhunt operation ug pagtumbok sa motibo sa krimen diin usa sa anggulo nga gitutukan mao ang kasungi-an sa pamilya kabahin sa pagsupak sa biktima sa tinguha sa mga igsuon niining ibaligya ang kumon nilang yuta.

Ang laing gitutukang anggulo mao ang pagkahilig niini sa tigbakay ug gituuhang nakakita kini og kaaway.  – BANAT NEWS