Upat ka level 3 pushers nadakpan

CEBU, Philippines - Upat ka gipasanginlang level 3 drug pushers nasikop human sa gipahigayong buy bust operation sa dalan Rafols barangay Poblacion syudad sa Toledo pasado alas-10 sa miaging gabii.

Ang mga nasikop mao sila Ernesto Ruben, 27, molupyo sa dalan Rafols sa barangay Poblacion, Jerry Gamboa, 42, molupyo sa Landsite barangay Poblacion, Carlo Pidad, 24, ug Baltazar Linehan, 59, pulos molupyo sa barangay Ibo.

Sa pakighinabi sa Banat News ni SPO4 Gil Lastimosa kini mibutyag nga ang ilang target unta sa buy bust operation mao si Ruben ginamit ang buy bust money nga nagkantidad og P200 bugti sa usa ka gamay’ng pakete sa gituohang shabu.

Human sa pagtunol sa shabu daling gisikop si Ruben ug giapil usab ang tulo nga gikatahong naaktuhan usab nga ‘nagdakop-dakop’ pa sa aso sa gituohang shabu.

Nakuha sa kapolisan ang mga paraphernalia susama sa tinfoil, tissue wicks, lighter, ug usa ka empty nga transparent plastic. Sa pakighinabi usab sa Banat News sa hepe sa kapolisan sa syudad sa Toledo nga si Supt. Jovito Canlapan kini mibutyag nga ang upat mga gitawag nga street pushers ug nabutang nga level three sa listahan sa tigbaligyaan og drugas. (BANATNEWS)