CEBU, Philippines - Nakuhaan sa iyang armas ug mga personal nga kabtangan ang usa ka babayeng gwardiya human kini gitulis diha sa sitio Soong sa barangay Mactan dakbayan sa Lapulapu sa milabay’ng gabii.
Ang biktima mao si Lourdes Tagalog, 31, residente sa barangay Poblacion dakbayan sa Lapulapu ug sakop sa Blue Breed Security Agency.
Personal midangop sa kapolisan si Tagalog ug mitug-an nga mga alas 11:25 sa milabay’ng gabii samtang nagbantay siya sa usa ka establisamento nga iyang gialagaran giduol siya sa tulo ka mga tulisan.
Duha sa mga suspetsado ang mition kaniya og pistola ug kutsilyo ug dihang iyaha untang bunoton ang iyang kalibre .38 nga service firearm ang ikatulong tulisan kalit nga misukmag kaniya. Gumikan niini milampos ang tulo ka tulisan sa pagkuha sa iyang armas, cellphone ug pitaka nga adunay sulod nga kwarta. Human sa maong insidente daling nakapahilayo sa maong dapit ang mga tulisan.
Human sa pagtaho ni Tagalog sa TRS sa kapolisan sa Lapulapu mihimo kini og pag- followup apan pakyas kini sa pagsikop sa mga tulisan. (BANATNEWS)