49-anyos gipuspusan

CEBU, Philippines - Naligo sa iyang kaugalingong dugo ang usa ka lalaki human gipuspusan sa usa ka mamintalay ug sakyanan diha sa sitio Bakilid, Purok 4, barangay Camputhaw dakbayan sa Sugbo pasado alas 9:00 kagabii.

Patay na sa dihang gidala sa Vicente Sotto Memorial Medical Center ang biktima nga si Rogelio Roy Ybañez Sr., 49, molupyo sa nahisgutang lugar kini human gipuspusan og usa ka puthaw nga bangko.

Ang suspetsado nailhan nga si Renato Matas, 30, usa ka mamintalay og sakyanan ug molupyo sa barangay Bugas, Badian ning dakbayan.

Base sa imbestigasyon sa kapolisan usa ka kauban niini nga nailang si Rey Ligsay, 38, nag-inom sila niadtong tungora apan misulod siya makadiyot sa ilang balay ug diha-diha nakabati siya og banha sa gawas.

Dihang iyang gisusi naabtan niya ang suspek nga padayong mibukbok sa iyang higala gamit ang puthaw nga bangko hinungdan nga misuway siya pagpakgang niini apan mikaratil kini og dagan.

Sa pakighinabi sa Banat News kang PO3 Geoffrey Gutual kini nagdudang posibleng gibali lang sa suspek ang away dihang ang biktima kalit nga nagmaoy ug gipang-abog ang ubang nanag-inom. Gumikan kay matud pa ni Gutual walay bisan usa sa mga nakasaksi nga nasayod sa sinugdanan aron buhaton sa suspek ang pagpuspos sa biktima. (Cherlie Domecillo-PIT intern)

TINDERA’G PRUTAS GITULIS, GIPATAY

Ni Rey Pasaporte

Gituohang gitulis sa wala pa dunggaba makadaghang higayon hangtud namatay ang usa ka ginang nga manindahay og prutas sa sidewalk kansang patay’ng lawas napalgan kagahapon sayo sa buntag diha sa duol sa usa ka bakeshop sa dalan Osmeña Blvd. sa barangay Capitol Site ning siyudad sa Sugbu.

Ang biktima giila sa mga sakop sa Homicide Section sa Cebu City Police Office (CCPO) nga mao si Urbana Monares, 50, taga San Vicente, lungsod sa Tabogon.

Si Monares nakaangkon og daghang samad dinunggaban sa kalawasan diha sa tiyan, ibabaw nga bahin sa walang dughan, liog ug walang bukton nga maoy nakaingon sa iyang hinanaling kamatayon.

Gituohan sa kapolisan nga gitulis una pa patya ang biktima sanglit nahanaw na ang halin sa iyang panindang prutas.

Si Rutsie Guisando nga usa ka tomboy ug manindahay usab og prutas sa maong lugar ang nakadiskobre sa biktima dihang iya kining nakit-an nga dunay dugo ang gihigdaan ni Monares hinungdan nga iyang gipukaw ang usa sa mga anak sa biktima ug gipahibawo.

Ang biktima nagbarong-barong nga matulog sa sidewalk diha sa maong lugar sulod na sa pipila ka mga katuigan.

Ang mga sakop sa Homicide Section sa CCPO nga gipangulohan ni PO3 Victor Ayuman nagkanayon nga wala pa gyud nila masuta kun pila ang salapi sa biktima nga giinteresan sa mga mamumuno.

Si Venancio manindahay usab og prutas ug anak sa biktima mitug-an sa kapolisan nga nawala na ang knapsack sa iyang inahan nga maoy gisudlan sa halin niini.

Gituuhan usab sa kapolisan nga misukol ang biktima sa mga tulisan sanglit nangabungkag naman ang kahon ug karton duol ilawom sa barong-barong diin naghigda si Monares.

Ang underwear sa biktima nahushos na sa ubos apan gituuhan sa anak nga posibling nangihi iyang inahan dihang gitulis. Gibutyag sa anak nga nakadungog siyang adunay nangaligid nga botelya apan wala lang niya panumbalinga nianang alas-3 sa kaadlawon.

Matud ni Guisando nga posibling mga rugby boys ang responsabli sa krimen sanglit dunay mga higayon nga dunay muaging rugby boys diha sa ilang nahimutangan ilabi na sa kaadlawon. (BANATNEWS)