2 gipusil, gidakdakan

CEBU, Philippines - Patay ang duha ka managhigala human kini gipusil ug gidakdakan og bato sa tulo ka magsuon didto sa sitio Toril, barangay Canjulao, dakbayan sa Lapulapu kagahapon sa kaadlawon.

Ang biktima mao sila si Paul Amigable Dico, 35, ulitawo ug Rapunsel Dungog alyas Sidot, 21, minyo, pulos mga residente sa maong dapit.

Gitumbok nga nagpatay sa managhigala mao ang magsuong Pedro Pebida III alyas Pepe, Pedro Pebida Jr. alyas Kokoy ug Patricio Pebida alyas Akting nga mga residente usab sa maong dapit. Base sa nasayran sa Banat News gikan ni SPO2 Rolito Jumao-as ug SPO3 Rex Ibañez, ang managhigalang Dico ug Dungog nag-inom mga ala una sa kaadlawon kagahapon sa maong dapit ug pipila ka gutlo miabot ang magsuong Pebida.

Unang miduol si Pepe nga nagdala og kutsilyo hinungdan sa ilang pagpanagan.

Wala makabantay si Dico nga sila si Akting ug Kokoy nag-atang kaniya sa agianan, hinungdan nga gipusil kini sa magsuong Pebida ug naigo sa ulo hinungdan sa hinanaling kamatayon niini.

Samtang si Dungog misuway og uwang sa mga Pebida gumikan kay manag-paryente ra kini, apan siya ang giatubang sa magsuon ug gidunggab ug gibunalbunalan og kahoy.

Wala matagbaw, gidakdakan pa gyud og dakong bato si Dungog hinungdan sa hinanaling kamatayon niini.

Human sa maong insidente, ang mga sakop sa Station 3 nga daling nakaresponde sa maong hitabo daling misikop ni Akting ug Pepe ug sa nagpadayong hot pursuit operation nasikop usab si Kokoy kagahapon sa buntag. Ang tulo ka magsuon nabalhog sa kapolisan sa Lapulapu.

Sa pakighinabi sa Banat News sa magsuong Pebida, hugot nilang gihimakak ang alegasyon ug mitumbok ngadto ni Dungog nga maoy misulong ngadto sa ilang panimalay hinungdan sa nahitabong krimen.

Matud pa ni Kokoy ug Akting nga nangatulog sila sa dihang namukaw kanila ang ilang igsuong si Pepe nga nagkadugo na ang ulo niini ug sa paglili pa nila sa gawas diha sa ilang tugkaran si Sidot nga nagdala og kutsilyo ug kahoy hinungdan nga ila kining gisita.

Si Pepe mipadayag nga samtang nag-inom sila uban sa mga biktima kalit gibunalan iyang ulo sa puan sa kalibre .357 ni Dungog hinungdan nga nangayo siya og pakitabang sa iyang mga igsuon.

Matud pa ni Kokoy daan na nga adunay panagbingkil ang ilang pamilya ug sa mga biktima apan kasamtangan kining nahupay sa pipila ka mga adlaw human nagkahigalaay na sila. Apan atol sa maong panag-inom ni Dico ug Dungog ug sa igsuong si Pepe, mibalik ang ilang panagbikil. (BANATNEWS)