Electronic governance ipatuman

MANILA, Philippines - Hingpit nang masayran sa publiko ang tanang trabaho sa mga konsehal sa dakbayan sa Sugbo sama sa mga resolusyon, ordinansa , ug uban pa nilang gimbuhaton sa konseho pinaagi sa pagmantala niining tanan sa website ubos sa usa ka sistema nga gitawag og electronic governance (EG).

Si Konsehal Roberto Cabarrubias kinsa maoy vice chairman sa Committee on Information Technology mibutyag kagahapon nga sa sunod sesyon iya nang iduso ang hangyo nga unta sugdan na sa pagpatuman ang EG aron hisayran na sa publiko ang mga resolusyon ug ordinansa nga giumol sa konseho sa dakbayan.

Sa maong sistema, masayran sa katawhan ang mga trabaho sa mga magbabalaod sa dakbayan kay mabasa naman nila kini sa computer, matud pa ni Cabarrubias.

Diha sa website sa dakbayan masayran na sa publiko ang gidaghanon sa mga naaprobahan ug wala pa kaaprobahi nga mga ordinansa ingon man ang mga gipatuman na ug wala pa usab ikapatumang balaod.

Si Cabarrubias mapasalamaton kaayo niining mga modernong kahimanan sa teknolohiya karon sanglit ang publiko nga walay alamag sa mga trabaho sa mga konsehal, may kahigayonan nang makasinati sa dakong kasayon pinaagi sa pag-abli sa ilang mga computer.

Ang EG dili lamang makaayo sa publiko kundili labaw sa tanan sa mga miyembro sa media o tigbalita sanglit sayon ra kaayo sila makapangapkap og kasayoran nga ikapaambit ug ikasabwag nila ngadto sa katawhan ilabi na niadtong dili pa suhito sa paggamit sa kahimanang computer.

Midugang si Cabarrubias nga pinaagi sa EG masayran na usab ang tanang proyekto nga kasamtangang gipatrabaho ug kadtong mga umaabot pang mga programa sa dakbayan.

Miingon usab si Cabarrubias nga dili lamang mga resolusyon , ordinansa ug mga proyekto ang iplastar diha sa website, kundili bisan ang pundo sa panudlanan sa dakbayan ipasundayag usab diha.

Gipaningkamutan ni Cabarrubias nga ikapatuman na sa sunod buwan ang EG sa City Hall.