CEBU, Philippines - Gibutyag kagahapon ni Kongresista Pablo Garcia sa ikaduhang distrito sa lalawigan sa Sugbo nga usa sa 5 ka Information Technology ( IT) mobile sa nasud adto itarok sa segundo distrito sa lalawigan sa Sugbo.
Sumala pa ni Garcia nga ang IT mobile, sama sa usa ka gamay nga classroom nga puno sa mga computer, ug mao kini usa ka labing bag-ong programa karon sa nasudnong kagamhanan nga maghatag sa mga batan-ong tinun-an og komprehensibong kahibalo sa paggamit sa computer ug uban pang mga IT program.
Midugang si Garcia nga ang maong IT mobile unang mapahimuslan sa mga estudyante sa high school sa mga publikong tulonghaan sa 15 ka mga lungsod sa segundo distrito.
Kini maoy labing una dinhi sa tibuok Visayas, ug i-turn over unya kini sa kagamhanan sa lalawigan sa Sugbo ngadto sa ikaduhang distrito aron magamit na kini sa mga tulonghaan didto.
Hinuon matud pa ni Garcia nga makatilaw usab niini ang ubang kalungsoran sa lalawigan human sa segundo distrito.
Midugang ang kongresista sa ikaduhang distrito nga giangay na niya pagbahin ang iyang P30 milyones nga Priority Development Assistance Fund (PDAF) ngadto sa 15 ka mga lungsod sa iyang distrito aron makasugod dayon ang mga mayor sa pagpatuman sa ilang mga proyekto.
Sa iyang bahin si Gobernador Gwen Garcia nagpasalamat sa iyang amahan niining pagpatuman sa labing bag-o nga IT mobile didto sa iyang distrito.
Kini tungod kay dako kini og ikatabang aron masibot ang mga kabataan sa pagkat-on sa labing bag-ong teknolohiya alang sa pagpalapad sa ilang kahibalo. – BANAT NEWS