CEBU, Philippines - Patay nang napalgan ang usa ka estudyante sa high school nga nalubong sa lapok ug nalumos sulod sa usa ka fishpond didto sa barangay Guinsay, syudad sa Danao sa miaging gabii.
Ang biktima giila nga si Roque Amoruto Vallejo, 13, nga taga sitio Central, barangay Guinsay ug estudyante sa first year sa Carmen National High School.
Sayo niini si SPO2 Felix Matbagon sa Danao Police Station maoy mipahibalo sa iyang mga kaubang polis bahin sa usa ka estudyanteng nalumos human siya pahibaw-a sa usa sa mga kauban sa biktima.
Sa dihang napalgan sa mga polis ang biktima, ila dayon kining gisakwat ug gihatod ngadto sa Danao District Hospital apan gideklarar kini nga dead on arrival.
Base sa inisyal nga imbestigasyon sa kapolisan, ilang nasayran nga ang lugar nga namatyan sa biktima usa ka fishpond nga bag-o pang gikuhaan og mga bangus sa tag-iya.
Sumala sa nakasaksi nga human og kuha sa mga bangus, milusad usab dayon sa fishpond ang biktima ug mga kauban pamasin nga makasikop pa og mga subrang isda nga nahibilin.
Apan samtang nalingaw og panikop og isda ang mga kauban, wala nila hibantayi ang biktima nga nalubong diay sa lapok hangtod nga kini nalumos ug nakabsan sa kinabuhi. – BANAT NEWS