Magna Carta sa mga kabus giduso

CEBU, Philippines - Nagtinguhang mopasar og resolusyon sa konseho sa dakbayan sa Sugbu ang bag-ohay lang napiling konsehal sa North District nga si Konsehal Alvin Dizon aron awhagon ang Kongreso pagpanday og Magna Carta alang sa mga kabus.

Si Dizon kinsa maoy tsirman sa Committee on Housing sa konseho sa dakbayan nagkanayon nga base sa Section 9 sa Article II sa Konstitusyon sa Pilipinas gihimong polisiya sa gobiyerno nga sigurohong walay mahimong kabus sa nasud.

Kini pinaagi sa paghingusog sa tukmang social services, pagsigurong dunay trabahong matrabahoan, pagpataas sa standard sa pagpuyo ug mas malambuong kalidad sa kinabuhi sa tanan.

Sumala pa sa resolusyon nga tumong sa nasudnong ekonomiya ang pagsigurong patas ang tanan nga makakuha og oportunidad nga makatrabaho ug makabenepisyo sa tanang kaayohang mapupo sa gobiyerno.

Matud pang Dizon nga usa ka komplikadong problema sa minilyong Filipino ang kakabus. Base sa 2006 report sa National Statistics Coordination Board nga 27.6 milyones nga Filipino ang kabus.

Dinhi lang sa Sugbu adunay 58,000 ka rehistradong pamilyang urban poor ug buot ni Dizon nga matabangan pinaagi sa Magna Carta sa mga kabus.

Matud pa niini batid na sa kadaghanan lakip na sa gobiyerno nga kinahanglang aduna silay aksyon aron matubag kining maong problema.

Ang Magna Carta for the Poor gilaraw usab karong ipasar ni North District Kong. Rachel “Cutie” Del Mar ngadto sa Kongreso nga mao ang House Bill 23 nga nagtinguha usab sa susamang tumong.

Gitinguha sa maong lakang ang paghatag sa lima ka mga dili mausab nga katungod sa mga kabus nga naglangkob sa trabaho, katungod nga makakaon ug makadawat og hinabang alang sa pagkaon, katungod sa patas nga libreng edukasyon, katungod nga makabaton og pinuy-anan ug katungod nga makadawat og libreng health services ug medisina.

Giawhag usab sa resolusyon si Presidente Benigno Simeon Aquino III nga ipasar dayon ang Magna Carta sa mga kabus alang sa hingpit nga katumanan ug implementasyon niini.

Si Aquino kinsa nangangkong walay kabus kun walay kurakot nanaad nga solusyonan ang kakabus pinaagi sa pagpukan ug pagsilot niadtong mga kawatan sa gobiyerno. – BANAT NEWS