Sa Comelec Gun Ban, Nagdala og snubnose nakombikto

CEBU, Philippines - Pagkabilanggo sulod sa usa ka tuig ug dili na makabotar pa sa eleksyon sa tibuok niyang kinabuhi ang gipahamtang nga silot sa korte ngadto sa usa ka lalaking nakuhaan og armas atol sa Comelec Gun Ban.

Ang gikombikto mao si Reysaldo Saavedra kinsa namatud-an diha sa sala ni RTC Judge Silvestre Maamo Jr. nga nakalapas sa Comelec gun ban nga gipatuman sugod niadtong Pebrero 9 ug natapos niadtong Hunyo 10.

Si Saavedra nadakpan sa kapolisan niadtong Mayo 8, 2010 og usa ka paltik nga .38 kalibreng snub nose nga rebolber nga may duha ka buhing bala diha sa gawas sa iyang panimalay nga walay papeles nga nag-exempt kaniya sa gun ban.

Atol sa pre-arraigment si Saavedra inabagan sa iyang abogado mi-plead guilty sa maong salaod.

Subay sa Omnibus Election Code, ang usa ka mapamatud-ang nakasala sa Comelec gun ban o bisan unsang salaod nga sakop sa maong balaod masilotan og dili momenus usa ka tuig apan dili molapas og unom ka tuig.

Did-an na usab silang makabotar sa tibuok nilang kinabuhi ug dili na makatrabaho pa sa bisan unsang ahensya sa gobiyerno. Samtang ang mga langyaw awtomatikong ipa-deport sa balik sa ilang nasud human maserbisyuhi ang silot. – BANAT NEWS