CEBU, Philippines - Nagbitay nang naabtan sa bana ang iyang asawa nga gituohan usab nga naghikog sulod sa ilang lawak sa sitio Cogon barangay Catarman pasado alas-otso sa buntag sa miaging adlaw.
Ang naghikog nailhan nga si Arlene Matarong Makirano, 36, molupyo sa nahisgutang lugar kinsa napalgan sa iyang banang si Jonathan Makirano nga wala nay kinabuhi.
Si Makirano personal nga midangop ngadto sa buhatan sa kapolisan kini aron ipahibalong iyang napalgang nagbitay sa ilang lawak ang iyang asawa.
Ang mga mirespondeng polis mao nay mihatod kang Arlene sa Eversley Hospital sa syudad sa Mandaue apan gideklarar nga dead on arrival.
Sa inisyal nga imbestigasyon sa kapolisan base sa pamahayag sa bana naghikot og habol sa liog ug ang pikas tumoy gihikot ngadto sa ilang kisame ang ginang.
Matud pa sa bana nga adunay higayon nga ang iyang asawa mibahad nga maghikog human kini masayod nga nagkasakit kini sa baga dihang miluwa na kini og dugo.
Sa pakisusi usab sa kapolisan sa crime scene wala silay nakitang mga timailhang adunay nahitabong kagubot sulod sa kwarto sa duha apan mirekomendar nga ipa-awtopsiya ang patay’ng lawas aron pagtino kun unsay gikamatyan niini. – BANAT NEWS