Namaligya'g binotelyang gasolina gisikop

CEBU, Philippines - Usa ka lalaki kinsa namaligya og binotelyang gasolina gidakop sa opisyal sa barangay Lawaan I niadtong Martes sa hapon.

Ang nadakpan mao si Semicolas Diego, 40, taga barangay Don Andres Soriano (DAS), Lutopan, dakbayan sa Toledo.

Ang tsirman sa kahapsay ug kalinaw sa konseho sa barangay Lawaan I kinsa wala magpaila sa iyang ngalan maoy misikop kang Diego, nga matud pa pinasubay sa Section 23 sa Fire Safety Code of the Philippines.

Naimbargo gikan kang Diego ang duha ka kaha sa softdrinks nga maoy gipanudlan og gasolina, tulo ka plastik nga container nga gibana-banang adunay sulod nga 30 ka litro nga gasolina matag usa, usa ka plastik nga container nga dunay sulod nga upat ka litrong gasolina, 15 ka botelyang tagsa ka litro nga pulos puno sa gasolina, pito ka basiyong botelya, duha ka embudo, usa ka litrong 2T nga adunay sulod nga 50ml nga gasolina ug usa ka plastik nga stall o lingkoranan.

Ang maong mga ebidensiya gitugyan dayon ngadto sa Fire Department sa siyudad.

Sumala sa balaod ang pagpamaligya sa masigaon kaayong butang sama sa gasolina gidili kini sa mga lugar nga dili gasolinahan gumikan sa kapeligro nga makamugna kini og sunog ilabi na sa mga lugar nga gilibotan sa daghang panimalay base sa ordinansa sa dakbayan.

Apan matud pa ni Talisay City Administrator Richel Bacaltos kinsa nahinabi sa Banat News kagahapon nga hangtod karon wala pa kahimoi og implementing rules ang nahisgutang ordinansa busa wala pa kini ngipon.

Gumikan niini wala lang ibalhug sa prisohan ang dinakpan alang sa gitawag nga “humanitarian reasons” ilabi na nga daghan usab nga namaligya og susamang produkto diha sa kadaplinan sa kadalanan sa maong dakbayan nga gipasagdan lang sa mga otoridad gumikan sa pagka-walay tango sa ordinansa.   (BANATNEWS)