Habal-habal idili sa Highway

CEBU, Philippines - Gitinguha sa Land Transportation Office kon LTO did-an na ang mga habalhabal diha sa mga national highways tungod sa disgrasyang nagpaabot.

Ang maong tinguha gibase ni LTO-7 regional director Raul Aguilos sa nahitabong sunod-sunod nga pagkadisgrasya sa mga bus sa kalungsuran ug sa nagkadaghang mga nabiktima sa mga disgrasya sa mga motorsiklo ilabi na sa mga habalhabal.

Matud pang Aguilos nga sagad sa mga drayber og habal-habal sobra kaayong makapakusog og padagan diha sa mga national roads ug labaw nang mas delikado alang sa mga pasahero ug sa drayber kun sa national highways pa gyud sila mangagi.

Sumala pa ni Aguilos nga sagad sa mga dagkong mga sakyanan kusog kaayong managan sa national highways busa mas maayong dili na lamang paagion sa dagkong mga kadalanan ang mga motorsiklong magdala og mga pasahero.

Iyang giawhag ang tanang mga Local Government Units paghimo og mga ordinansa nga magdili sa mga habalhabal sa pag-agi sa highway.

Si Aguilos nagkanayon nga kadtong mga LGU nga may ordinansa nang napasar angayang mopatuman gyud niini samtang wala pay dagkong dautang nanghitabo sa ilang mga dapit.

Samtang giklaro ni Aguilos nga ang mo-renew ug mokuha og mga lisensiya sa motorsiklo apil na ang mga operator sa habalhabal gikinahanglang mopaubos sa mandatory seminar aron makat-on kining magmatngon.   (BANATNEWS)