Bise gob. patubagon sa isyu sa 3 barangay sa tuburan

CEBU, Philippines - Ipatawag unya sa buhatan sa lalawigan sa Sugbu si Bise Gob. Gregorio Sanchez aron patubagon sa nagpadayong imbestigasyon sa Kapitolyo labot sa anomalosong road opening project sa tulo ka mga barangay sa lungsod sa Tuburan.

Sumala pa ni Capitol Consultant on Information Rory Jon Sepulveda nga padad-an unya ni Gob. Gwendolyn Garcia og suwat si Sanchez nga mag-imbitar kaniyang motubag sa imbestigasyon sa proyekto sa tulo ka mga barangay sa lungsod sa Tuburan.

Kini tungod kay wala magkadimao ang liquidation sa mga kapitan sa Kamansi barangay kapitan Jolito Talaugon, Kalangahan barangay kapitan Malaquias Bardoquillo ug Tumugpa barangay kapitan Leonardo Baldespinoza.

Ang tulo mipasangil kang Sanchez nga maoy nagbuot sa proyekto sanglit wala man sila’y technical knowledge sa pagpatuman niini.

Matud pa ni Sepulveda nga ang una niyang ipangutana ngadto kang Sanchez kun si kinsa si ‘Ababa’ nga maoy gitumbok nga tag-iya sa bulldozer nga gigamit niini sa tulo ka mga barangay nga walay bayad.

Dugang pa ni Sepulveda nga sa pasiunang findings sa ilang imbestigasyon mihulagway niini nga "technically ma-liquidate ang maong proyekto."

Sumala pa ni Sepulveda wala magkadimao ang mga dokumento hinungdan nga mitug-an na lamang ang tulo ka mga kapitan nga igo lamang silang gisultihan sa bise gobernador unsay ilang buhaton sa proyekto ug mao kini ang usa sa ilang basehanan sa pagpatawag unya kang Sanchez.