Joavan mihimakak sa pasangil

CEBU, Philippines - Gipanghimakak sa anak ni Mayor Socrates Fernandez sa dakbayan sa Talisay kagahapon ang pasangil sa usa ka magti-ayon nga gi-atang- atangan kuno niya sila ug gihasi samtang nagpaingon na sila sa dakbayan sa Mandaue aron moatiman sa ilang negosyong barbekyuhan sa miaging adlaw.

Sa pakighinabi sa Banat News kang Joavan Fernandez nga anak ni Mayor Fernandez, mipasabot siya sa iyang kahimangod sa pasangil sa magtiayong Edmund Rosaroso ug Benita batok kaniya tungod kay wala man siyay gibuhat nga dautan kanila.

Giangkon ni Joavan nga niadtong miaging gabii may gibisitahan siyang higala didto sa Duljo-Fatima, ning dakbayan sa Sugbo ug iyang gi-parking ang iyang Green Pajero nga adunay plate number GNZ 357 sa usa ka dead end sa maong dapit.

Wala usab siya masayod nga nabangga-an diay ang lubot sa iyang sakyanan sa sakyanan sa magtiayon ug gani nakita niya nga nagaras kini.

Unya matud pa ni Joavan nga samtang gisil-ing niya ang garas sa iyang sakyanan , maoy nabati niya nga puwerting hiwasa ug tagawtaw sa magti-ayon ug gipugngan siya nga dili palakton kay mukuha sila og towing truck.

Busa milingkod siya sa sulod sa iyang sakyanan samtang naghuwat sa towing truck.

Dihang miabot ang taga towing, iya silang gipasabot bahin sa nahitabo   hangtod nga gipalarga siya.

Wala usay plakang “mayor” ang iyang sakyanan kay ang gigamit niya mao ra kadtong ordinaryong plaka niini sukwahi sa pamasangil sa magtiayon.

Busa miingon si Joavan nga dihang nabati niya nga gipasanginlan siya sa magtiayon, mibati siya og kahiubos niini sa pagduda nga himoon na usab kining isyu aron makontrobersya na usab ang iyang ngalan. – BANAT NEWS