P5M separation pay sa opisyal sa MCIAA gibabagan

CEBU, Philippines - Gibabagan sa Visayas Ombudsman ang pag-release sa P500 mil nga separation pay nga gihatag sa Mactan Cebu International Airport Authority Board ngadto sa miretirong regional director sa Department of Tourism nga si Patria Dawny Roa tungod sa pagserbisyo niini sa board sulod na sa 15 ka tuig.

Gipahibawo ni Assistant Ombudsman Virginia Palanca Santiago sa interbyu sa DyRF kagahapon nga iya nang gitawagan ang resident auditor sa MCIAA nga si Delfin Aguilar nga dili una ipagawas ang benepisyong ihatag sa board ngadto kang Roa.

Matud pa ni Santiago nga iyang nakita nga balido ang reklamo sa mga kawani sa MCIAA nga dili makiangayon ang paghatag sa board sa maong benepisyo tungod sa kadako sa maong kantidad wala pay labot sa laing retirement benefits nga makuha ni Roa gikan sa DOT.

Sumala pa niini nga bisan gani ang career ug mga regular nga empleyado sa nahisgutang airport gagmay ra kaayo ang madawat nga retirement benefits kun itandi sa giplanong ihatag kang Roa nga dili gani regular nga empleyado o opisyal sa MCIAA.

Matud pa ni Santiago nga ang Ombudsman Visayas mosusi nganong ingon niini kadako ang benipisyong mahatag kang Roa ug kun aduna bay igong katungod ang board paghatag sa maong benepisyo.

Gitawgan usab ni Santiago ang Commission on Audit kon COA regional director nga si Atty. Danilo Pala aron susihon ang maong isyu kun dili ba kini mahulog sa sobrang paggamit sa gahom sa board aron makabenepisyo ang ilang kaubanang miyembro.

Samtang giklaro ni Capitol Consultant on Information Rory Jon Sepulveda nga si Gob. Gwendolyn Garcia nga maoy naglingkod isip chairman sa MCIAA Board wala makatambong sa tigom sa board dihang napasar ang resolusyon nga maghatag og tunga sa milyon nga separation pay kang Roa busa dili angayang iapil ang gobernadora sa paglambigit sa maong isyu.

Hinuon giklaro ni Sepulveda nga sigon sa charter sa MCIAA board, ang mga miyembro niini may legal nga gahom sa paghatag sa maong benepisyo tungod usab sa kataas na sa tuig nga pagserbisyo ni Roa ug nga walay katungod ang mga empleyado nga makakwestyon sa “wisdom” sa board sa pagpakanaog sa maong desisyon.