Papa, anak nabulit samad pinusilan

CEBU, Philippines - Nabulit sa samad pinusilan ang kalawasan sa amahan ug anak nga nagpahayahay sa gawas sa ilang pinuy-anan human sa panihapon human gipusil gamit ang pugakhang diha sa bukirang bahin sa sitio Canhangkoy sa barangay Elpardo lungsod sa Boljoon sa miaging alas-7 sa gabii.

Ang biktima mao ang manag-amahang sila si Claudio Romaguera, 57, ug anak niining si Jowawen Romaguera, 27, mga molupyo sa nahisgutang lugar.

Matod ni SPO4 Cristino Uraca, ang luyo-luyong hepe sa Boljoon Police dihang nahinabi sa Banat News subay sa imbestigasyon ang mga biktima nanggawas sa ilang balay human sa panihapon aron manigarilyo.

Apan kalit lang mipaka ang usa ka lanog sa buto sa armas ug namatikdan sa mga biktima nga namanhod ang ilang kalawasan ug diha pa nila mahibaw-ing sila maoy gipuntariya sa namusil.

Daling gihatod sa mga kabanay ang duha sa Oslob District Hospital apan tungod sa daghang mga samad sa kalawasan gibalhin sila sa Vicente Sotto Memorial Medical Center (VSMMC). Ang mga biktima nakaangkon og mga samad agi sa daghang bolitas.

Samtang ang mga wala mailhing mamumuno misibat human sa hitabo ug wala na maabti sa mirespondeng mga polis. Naglisod karon ang kapolisan gumikan kay walay bisan usa nga nakakita sa hitabo. – BANAT NEWS