CEBU, Philippines - Subling gibuhi ang isyu kabahin sa pag-deputized sa mga polis aron makatabang sa gimbuhaton sa pagbantay sa kahapsay ug kaluwasan sa trapiko atol sa pakigtigom ni Gob. Gwendolyn Garcia sa nagkadaiyang ahensya sa gobiyerno kagahapon.
Gilabtikan usab ni Garcia ang LTO kabahin sa wala nila pagsikop sa mga sakyanan sa dakbayan sa Sugbu nga nagdagan sa kadalanan nga walay mga plaka.
Mitambong sa maong tigom mao ang mga miyembro sa Cebu Provincial Bus Operators Association, LTFRB-7 regional director Benjamin Go, LTO regional director Raul Aguilos, PRO-7 regional director Chief Supt. Lani-o Nerez ug Cebu Provincial Police Office kon CPPO director Sr. Supt. Erson Digal kagahapon sa hapon.
Mipahinumdum ang gobernadora nga kun ang LTO nanginahanglan og tabang gikan sa kapolisan gikinahanglang mahatagan sila og deputation sama sa gihimo sa Philippine Drug Enforcement Agency alang sa pagtabang sa pagsulbad sa problema sa illegal nga drugas.
Si Aguilos sa iyang bahin mitumbok nga ang ilang buhatan makahimo sa gihangyo sa gobernadora pinaagi sa usa ka kasabutan.
Kaniadto adunay deputation ang kapolisan gikan sa LTO apan gumikan sa pagpangabuso sa mga polis sa ilang katungdanan ug mga pasangil sa pagpangilkil giwagtang kini.
Unang gituki ni Garcia ang nag-unang hinungdan sa nahitabong mga disgrasya sa kadalanan nga naglambigit sa mga bus nga mikalas na og 40 ka mga kinabuhi sulod lamang sa pipila ka mga semana.
Si Aguilos mitumbok dayon nga ang mga disgrasya nahitabo gumikan sa pagka-kaskasero sa mga drayber ingon man ang mga depektosong mga brakes ilabi na sa mga karaang mga units.
Matud pa ni Aguilos nga nakahimo na sila og mga lakang sama sa pagpaubos sa mga drivers sa mga sakyanan sa mga bus liners nga tukmang trainings ug seminars uban ang istriktong monitoring sa ubang mga units.
Si Garcia miklaro usab sa mga opisyales sa LTO sa kapakyas niini sa pagsitar sa mga Kaohsiung bus sa siyudad sa Sugbu nga nagdagan sa kadalanan nga walay plate numbers ug gikasuk-an pa ang mga polis sa probinsiya nga midakop niini. Nasayran sa gobernadora pinaagi sa ubang mga opisyales sa LTO nga igo lamang kining gisugo sa labaw nga may relasyon ngadto sa mga opisyales sa siyudad sa Sugbu.
Tungod niini gitumbok sa gobernadora nga dili gyud unta angayan nga ikompromiso ang seguridad sa mga pasahero sa mga pamolitika sa mga opisyales sa Sugbu. – BANAT NEWS