Mga wang-wang, fog lamps gipresentar

CEBU, Philippines - Kapin sa gatus ka wang-wang ug fog lamps ang nasakmit sa mga tinugyanan sa Highway Patrol Group (HPG)-7 gikan sa mga pribadong sakyanan dinhi sa Sugbo ug ubang bahin sa Central Visayas sukad si Presidente Benigno Simeon Aquino III milingkod niadtong Hunyo 30.

Si Chief Supt. Lani-O Nerez, director sa Police Regional Office-7 mipresentar sa 42 ka wang-wang ug 184 ka fog lamps kagahapon sa buntag nga nakunpiskar sa mga sakop sa HPG-7 sulod lang sa kapin usa ka semana nga operasyon sukad milingkod si Aquino.

Si Nerez mimando sa hepe sa HPG-7 nga si Sr. Supt. Fortunato Guerrero nga ipadayon ang operasyon batok sa mga sakyanan nga dunay wang-wang ug fog lamps subay sa implementasyon sa Presidential Decree 96.

Matud ni Nerez nga nakuha ang maong gidaghanon gikan sa mga checkpoint nga gipahigayon sa HPG-7 gikan sa mga pribadong sakyanan samtang ang uban gi-surender kanila.

Si Nerez nagkanayon nga wala pay nakonpiskar gikan sa mga law enforcement agency.

Giklaro niya nga ang gitugotan lamang nga mag wang-wang ug mag-blinker kadto lang mga sakyanan sa bombero ug ambulansya nga dunay salbaron nga mga kinabuhi ug ang mga sakop sa kapolisan nga motubag og alarma.

“Kun dili nato ni hingusgan ang kampanya sa siren, ang uban nga sibilyan maglibog man gud ug unsa ni sila, polis ba o dili. Bisan atong kapolisan dili mogamit og wang-wang basta walay respondihan kay basin unya og mouli lang sa ila unya mogamit og wangwang o siren,” matud pa ni Nerez.

Giklaro usab niya nga bisan suod pa niyang higala, iya gyud ipadakop basta mogamit og wang-wang o siren ug fog lamps.

Si Guerrero sa iyang bahin nanawagan sa publiko nga kun dunay mag wang-wang   kinahanglan kuhaon ang plate number sa sakyanan ug mo-report dayon sa ilang buhatan kay sila nay mangita ug atngan ang maong sakyanan.

“Kahit kapitbahay ninyo, kami nang bahala kay amo nang atngan ini’g gawas ana sa balay,” padayag pang Guerrero.  – BANAT NEWS