Tag-iya sa V&JA bus gipangayoa'g position letter

CEBU, Philippines - Mipatin-aw kagahapon sa buntag sa buhatan sa Land Franchising and Regulatory Board (LTFRB-7) ang tag-iya sa V&JA Bus Lines nga si Dulce Gantuangco pipila ka adlaw human sa nahitabong disgrasya sa usa sa mga sakyanan niini diha sa DAS-Landing (Lutopan) sa dakbayan sa Toledo nga mikalas og 15 ka kinabuhi ug 65 ang naangol.

Si Gantuangco mi-presentar ngadto kang Atty. Evelyn Misal ang hearing officer sa gipahigayong summary procedure sa LTFRB-7 sa accident report nga ilang nakuha gikan sa kapulisan sa siyudad sa Toledo human gipa-summon ni LTFRB-7 director Benjamen Go.

Gani lakip sa gi-presentar ni Gantuangco ang mga resibo sa gibana-banang 900 mil pesos na niining nagasto sa hospital, ingon man mga tambal ug cash assistance sa mga biktima.

Matud pa ni Guntuangco nga ang maong gastos wala pay labot sa burial claim nga tag 60 mil pesos niadtong mga namatay ug ingon man gihatagan usab nila ang mga nangaangol og tag P3 mil ngadto sa P5 mil nga hinabang ug gilibri pa og sakay pauli balik sa ilang lugar.

Ang LTFRB-7 mimando kang Guntuangco pagduso og position paper sulod sa 15 ka adlaw uban sa kompletong detalye aron mao kini basehan sa pagtuon kun angayan na bang libkason o ipadayon pa ang suspensyon sa ilang operasyon.

Pagkakaron, suspendido ngadto sa 30 ka adlaw ang nahabiling lima ka sakyanan sa V&JA samtang gipaubos pa sa road worthiness test ingon man gipaubos pa sa written exam ang mga drayber niini. – BANAT NEWS