CEBU, Philippines - Suspek sa mibanhig patay sa negosyanteng si Manuel Ting sa miaging bulan sa barangay Tisa, siyudad sa Sugbo gipasakaan og kasong murder kagahapon sa buntag sa piskaliya. Ang Cebu City Police Office ug Task Force Ting miila sa suspetsado nga si Ruel Lanit Velez, 44, minyo, taga-Ocaña, siyudad sa Carcar.
Si Sr. Supt. Patrocinio Comendador, direktor sa CCPO ug sakop sa Task Force Ting nagkanayon nga positibong giila sa duha ka eyewitnesses si Velez nga maoy mibanhig patay kang Manuel niadtong Hunyo 22. Matud niya nga sa mga alas 3 sa hapon niadtong Lunes si Velez gipik-ap sa grupo ni Sr. Insp. Bonifacio Garciano, hepe sa Theft and Robbery Section (TRS) uban ni Supt. Pablo Labra II, Deputy City Director for Operations sa CCPO duol sa Ayala Business Park ug gidala sa CCPO diin positibong giila sa duha ka testigos. Mitug-an si Comendador nga sa wala pa mahitabo ang pagkasikop ni Velez, adunay usa ka polis nga maoy nagsige og kontak ni Velez didto sa Ozamis City nga mopakita nalang sa kapolisan aron mohatag og katin-awan sa kamatayon ni Manuel Ting. Human niadto, si Velez nanawag kang Comendador ug nangutana kabahin sa iyang seguridad kun mopakita sa kapolisan hinungdan nga gipasaligan sa maong opisyal nga walay manghilabot kaniya.
Giklaro hinuon ni Comendador nga ang ilang pagdakop kang Velez nahulog pa sa hot pursuit operation sanglit duha ka adlaw human gibanhigan si Manuel niadtong Hunyo 22 duna na silay impormasyong nadawat nga si Velez maoy triggerman.
Gumikan niini, ang grupo ni Chief Insp. George Ylanan, hepe sa Investigation and Detective Management Branch (IDMB) sa CCPO daling miadto sa Carcar aron unta sa pagsikop niini apan giingong nakabiya na kini sa Ocaña paingon ngadto sa Dumaguete dayon ngadto sa Ozamis. Gawas sa duha ka testigos, ang anak ni Manuel mitug-an sa kapolisan nga duha ka semana sa wala pa banhigi iyang amahan nakit-an si Velez sa usa ka hardware sa barangay Mambaling nga naniid sa kalihukan sa biktima.Wala motug-an si Velez kinsay nagsugo kaniya pagpapatay kang Manuel.