TOMBOY NAGPUSIL SA ULO

CEBU, Philippines - Patay na nga napalgan sa katabang sa panimalay ang usa ka 50-anyos nga general manager sa usa ka trucking company kinsa giingong nag-unay og pusil sa iyang ulo niadtong Martes sa hapon diha sulod sa giabangan niyang kwarto sa Maria Paloma Subdivision, barangay Labangon, dakbayan sa Sugbo.

Ang naghikog giila sa mga polis nga si Arlyn Balagot, nagpuyo sa nahisgutang lugar apan lumad nga taga Valencia, Bohol, general manager sa Pride of the South Trucking Services nga nahimutang sa dakbayan sa Mandaue.

Base sa imbestigasyon sa kapolisan sa Homicide Section sa Cebu City Police Office nga si Balagot nag-abang og kwarto sa balay nga gipuy-an sa magtiayong Timothy ug Juana Abay.

Matud usab sa mga polis nga napulo na ka tuig nga kuyog-kuyog og puyo sa magtiayong Abay si Balagot diin bisan asa sila mobalhin uban usab kanila si Balagot.

Ang katabang sa magtiayong Abay nga si Lony Cabangcal mga alas 4:20 sa hapon giingong nakadungog og usa ka buto apan wala lang niini panumbalinga.

Pila ka minuto ang milabay ang amo ni Balagot nga si Maliry Saloria kinsa diha sa usa ka klinika nanawag diha sa balay sa magtiayong Abay ug nangita kang Balagot tungod kay buot kining magpakuha gikan sa klinika.

Si Cabungcal kinsa maoy nakatubag sa tawag sa telepono nanuktok ngadto sa kwarto ni Balagot apan walay mitubag hinungdan nga ang nahisgutang katabang mikuha og master key ug giablihan ang pultahan sa kwarto.

Maoy nasugat sa panan-aw sa katabang si Balagot nga nagluhod diha sa sawog samtang ang nawong niini ug duha ka kamot diha ibabaw sa katri.

Ang tuong tampihak ni Balagot dunay usa ka samad pinusilan diin ang bala milahos ngadto sa walang bahin.

Sa tuong kamot ni Balagot nahimutang ang usa ka kalibre 9mm nga pistola ug sa walang kamot ang kolor green nga rosaryohan.

Na-recover usab sa mga polis gikan sa crime scene ang 13 ka buhing bala diin usa niini ang nag-ungot pa sa cylinder sa pusil.

Si PO2 Jodan Batucan mibutyag nga ang kabahin sa problemang pinansiyal ang usa nga ilang gitutokan nga hinungdan sa hitabo.

Ang patay’ng lawas ni Balagot gidala diha sa Saint Francis Funeral Homes sa N. Bacalso Avenue, dakbayan sa Sugbo alang sa autopsy ug ipaubos usab kini sa parafin test. (Gikan ni Niña Sumacot sa The Freeman)