2 ka tawong nagkarga og Himbabawod nadakpan

CEBU, Philippines - Duha ka tawo ang nadakpan uban sa 32 ka mga pinutol nga punoan sa kahoy nga Himbabawod nga ilang gikarga sa ilang sakyanan didto sa barangay Manipis niadtong Martes sa kaadlawon.

Ang nagtingkagol na karon sa prisohan sa Talisay   mao sila si Sofronio Alcos Jr., 22, ug Promenio Bua, 22, pulos drayber ug konduktor   sa PUJ nga nagtangag sa plakang GWV-627 nga maoy gikargahan sa mga kahoy,ug taga barangay Tabunok, ug Bulacao, sa dakbayan sa Talisay ang usa ug usa.

Samtang ang mga troso nga Himbabawod anaa na usab karon sa kustodiya sa kapolisan sa maong dakbayan.

Si Kapitan Joselito Laurente uban sa iyang mga tanod nga sila si Eduardo Herbias, Esperidion Jabonita, Antonio Aljat ug Edito Silva nag-roving niadtong higayona dihang nasiplatan nila ang sakyanan nga gikargahan sa mga kahoy busa ila kining gigukod.

Gigamit ni Laurente ang iyang kaabtik pinaagi sa pagbabag sa iyang multi-cab sa karsada aron nga dili makalusot ang sakyanan nga gikargahan sa kahoy.

Matud pa ni Laurente nga gawas kang Alcos ug Bua aduna pa silay laing tulo ka kaubang wala hiilhi kinsa abtik kaayong nakalayat sa sakyanan ug mikaratel og panagan ngadto sa kalibonan

Gibutyag sa  kapitan nga ang Himbabawod usa ka matang sa fine wood nga haum kaayong himuong mga fashion accessories.

Niadtong tuig 1930 ang barangay Manipis, Tapul, Jaclupan ug Camp 4, kauban sa pito ka mga barangay nga gihimong Osmeña Reforestation Project.

Miingon si Laurente nga ang Manipis maoy labing karaan nga Reforestation Project sa nasud.

Gawas sa Himbabawod duna pay laing mga fine wood o maayong klase sa mga kahoy sama sa Narra nga anaa sa Manipis karon.

Mikabat na sa upat ka mga sakyanang gikargahan og kinawat nga mga kahoy ang nadakpan sa mga opisyal sa barangay Manipis sukad sa milabay’ng tuig hangtud karon, ug ang mga suspetsadong nadakpan napasakaan na usab og kaso ngadto sa buhatan sa Department of Environment and Natural Resources (DENR). (Brenda D. Batuto).  (BANATNEWS)