Natulog gipusil namatay

CEBU, Philippines - Nakabsan sa kinabuhi ang usa ka drayber sa traysikad kinsa gipusil sa wala hiilhing mga lalaki samtang natulog sulod sa iyang sakyanan duol sa barangay hall sa Aliwanay, lungsod sa Balamban kagahapon sa alas 12:30 sa kaadlawon.

Ang biktima mao si Anres Paglinawan Cobong, 31, nga taga Barangay Bayong sa maong lungsod , ug drayber sa traysikad.

Si SPO3 Arvie Banate imbistigador sa Balamban Police Station mibutyag sa Banat News nga malagmit gikapoy sa pamasahero ang biktima hinungdan nga gi-parking niini ang iyang traysikad ug natulog siya sa sulod niini.

Apan ang mga saksi nagkanayon nga may duha ka wala hiilhing mga lalaki nga miduol sa biktima ug usa niini milanit sa armas de fuego nga wala hisayri ang kalibre ug gitirohan ang ulo sa biktima.

Dihadiha namatay ang biktima gumikan sa pagkabuslot sa bagolbagol niini agi sa wala hisayring kalibreng bala sa armas.   (BANATNEWS)