Hubog gi-shotgun namatay

CEBU, Philippines - Usa ka hubog nga trabahante sa vulcanizing shop kinsa nanglabay og botelya, ug nanghagit   sa usa ka security guard nga nagbantay sa usa ka establisamento sa dalan FF Cruz sa North Reclamation Area sa barangay Subangdaku, dakbayan sa Mandaue, gi-shotgun patay sa naulahi sa miaging gabii.

 Ang biktima nailhan lang sa angga nga “ Bungol” ug wala matino ang pinuy-anan, walay klarong address, ug nagtrabaho sa usa ka vulcanizing shop sa maong lugar.

Samtang ang suspetsado mao si Hilario Quilistino, hingkod, ug wala usab hisayri ang pinuy-anan.

Si Inspector Romil Morpos, hepe sa Investigation Detection and Management Bureau (IDMB) sa kapolisan sa maong dakbayan mibutyag sa Banat News  nga ang biktima hubog nga mitumaw og kalit sa gibantayang establisamento sa suspetsado ug sa walay igong hinungdan gilabay og botelya ang guwardiya.

Unya human og labay sa botelya misinggit kini uban sa hagit nga papusil siya dayong dagan pahilayo.

Apan si Quilistino kinsa gibati og kapungot, wala na makapugong sa iyang kaugalingon ug gigukod ang biktima, dayon gitirohan kini sa iyang shotgun.   (BANATNEWS)