CEBU, Philippines - Patay ang usa ka pasahero ug naangol ang laing siyam niya ka kauban, apil na ang drayber sa multicab nga natumba human mawad-an og preno samtang nagdulhog sa sitio Malacorong, barangay Usmad, lungsod sa Argao niadtong Domingo sa alas 11:30 sa buntag.
Ang mga naangol mao ang drayber ug tag-iya sa multicab kolor orange (YVK-975) nga giilang si Zacarias Sabado, molupyo sa barangay Talaytay, Argao.
Samtang ang namatay nga pasahero mao si Ereberto Codilla, molupyo sa barangay Candaguit, Sibonga.
Samtang ang ubang mga naangol mao sila si George Monteller, taga Banilad siyudad sa Sugbo; Hacienta Sabado, taga Talaytay, Argao; Lucy Corilla, taga Candaguit, Sibonga; Herbert Pantenople, taga Humgaw, Argao; Amelia Pantenople, taga Humgaw Argao; Kenneth Aldrin Ariza, Langtad Argao; Mark Canapio, ug ang 11-anyos nga si Adrian Embalsado, taga Tulic Argao.
Matud ni PO2 Benjamen Herozaga sa Argao Police Station sa dihang nahinabi sa Banat News nga ang multicab gikan sa barangay Linut-od ug puno sa mga sakay paingon unta sa lungsod sa Argao.
Apan pag-abot sa dulhogon ug kurbadahung bahin sa maong lugar, kalit nawad-an og preno ang multicab. Naningkamot ang drayber sa pagbangga niini aron dili matambog sa pangpang apan natumba na hinuon kini.
Tanang sakay ang nakaangkon og mga bun-og ug pangos ug daling gihatod sa Isidro Kintanar Memorial Hospital sa lungsod sa Argao apan namatay gyud si Codilla tungod sa grabeng kadaot nga naangkon sa iyang kalawasan.
Samtang ang ubang pasahero nga nagrabehan, gilahos sa Vicente Sotto Memorial Medical Center (VSMMC) alang sa dugang medikasyon.
Kahinumduman, nga nagsunodsunod ang disgrasya sa kadalanan nga mikalas og daghang kinabuhi. Nagsugod kini sa pagkatagak sa tourist bus sa JD Tours sa Cansomoroy, Balamban, pagkatangtang sa container van sa trailer truck sa Poog, Toledo, ug niadtong Sabado nadasmag sa konkretong koral ang Corominas Bus tungod sa pagkawagtang sa preno.
MOTOR VS BUS; 1 PATAY
Patay ang drayber sa motorsiklo human nagkadinasmagay sa gikasugat niining bus de pasaheroan didto sa sitio Guiwanon, barangay Poblacion, lungsod sa Compostela niadtong Domingo sa alas 6:30 sa gabii.
Si Marvin Cabanes, molupyo sa barangay Cabadiangan ug drayber sa Honda 125 namatay gyud sa disgrasya. Samtang ang drayber sa gikadinasmagay niyang bus de pasaheroan mao si Francis Castro Loyola, ug molupyo sa barangay Macaas, lungsod sa Catmon.
Matud ni PO2 Fedilito Jopia, imbestigador sa Compostela Police Station sa dihang nahinabi sa Banat News nga ang motorsiklo paingon sa siyudad sa Danao samtang ang bus gikan sa siyudad sa Sugbo ug paingon sa habagatan apan mipabulhot aron pag-overtake sa gisundan niining laing sakyanan apan nagkasugat hinuon sa motorsiklo.