30-ADLAW SUSPENSION SA V&JA BUSES GIPATUMAN

CEBU, Philippines - Pormal nang gi-serve kagahapon sa buntag ang 30 ka adlaw nga suspension order sa mga lokal nga opisyal sa Land Transportation Office (LTO-7) ug Land Transportation Franchising and Regulatory Board (LTFRB-7) ngadto sa V&JA, tag-iya sa Corominas bus nga nadasmag sa konkretong koral niadtong Sabado sa hapon didto sa Lutopan, dakbayan sa Toledo nga mikalas og 15 ka pasahero ang patay ug 57 ang nangaangol.

Apan sa wala pa gi-serve ang suspension order ngadto kang Dulce Gantuangco, mipahigayon una og press conference sila si LTO-7 regional director Raul Aguilos ug LTFRB-7 regional director Benjamin Go. Matud ni Aguilos nga ilang ipa-ubos sa road worthiness test sa Motor Vehicle Inspection Service sa LTO ang lima sa unom ka bus sa V&JA ug ipa-ilawom sa drug test ug written test ang mga drayber. Kagahapon sa alas 4 sa hapon magtigom diha sa Sacred Heart Center ang mga opisyal sa LTO, LTFRB, PNP, DPWH ug ang Department of Transportation and Communication (DOTC) kinsa maoy lead agency alang sa Regional Road Safety Council meeting aron pagkab-ot og mga measures, rekomendasyon aron dili na masublian ang sunod-sunod nga aksidente sa kadalanan.

Nasayran miabot na og 40 ka mga tawo ang namatay sulod lang sa 21 ka adlaw sa nahitabong aksidente sa kadalanan, una niini mao ang JD Tours nga mikalas og 21 ka mga tawo human nahulog sa bung-aw sa Cansumoroy, Balamban, gisundan sa trailer truck sa barangay Poog, Toledo nga mikalas og upat ug katapusan niadtong Sabado.

Kagahapon gitangtangan og mga plaka sa LTO-7 ang unom ka bus sa V&JA.

Si Gantuangco nga nahinabi sa mga tigbalita kagahapon nagkanayon nga andam kompletohon ang gikinahanglan sa iyang bus aron malibkas ang 30-days suspension ug makabalik dayon og biyahe.

Mipasalig hinuon si Gantuangco nga mahatagan og P30 mil matag usa nga namatay nga pasahero, kini base sa ilang insurance, samtang tag P2,500 pa ang ilang nahatag usab sa mga nangaangol sanglit nag-agad lang sila sa gidemanda nga tambal sa mga pasyente.

(BANATNEWS)