CEBU, Philippines - Mikabat ngadto sa 23 ka mga wang-wang nga gitaod sa mga motorsiklo ang na-embargo sa mga polis sa dakbayan sa Talisay sa gipahigayon nilang checkpoint niadtong Sabado sa gabii diha sa barangay Lagtang.
Si Sr. Insp. Marlon Gumabao, deputy chief sa Talisay City Police Station sa pakighinabi niini sa Banat News kagahapon nagkanayon nga misunod sila sa kamanduan sa provincial headquarter sa pag-implementar sa Task Force Motorsiklo checkpoint ug kompiskahon ang mga wang-wang nga gipangtaod niini.
Gibutyag usab ni Gumabao nga ang provincial headquarter maoy magbuot kung asa silang dapita nga barangay sa siyudad ug kung unsa silang orasa mopahigayon og checkpoint aron masurpresa ang mga badlungon.
Niadtong Sabado alas 6:00 sa gabii ngadto sa alas 8:00 sa gabii ang gipahigayong operasyon sa mga polis batok sa mga dunay wang-wang nga motorsiklo diha sa Lagtang.
Gawas sa wang-wang tuyo usab sa kapolisan ang pagmenus sa mga insidente sa krimen sama sa tulis sa kadalanan. – BANAT NEWS