Overloaded ang bus - Canlapan

CEBU, Philippines - Ang hepe sa kapolisan sa dakbayan sa Toledo nga si Senior Inspector Jovito Canlapan nagkanayon nga overloaded gyud ang nadisgrasyang bus de pasaheroan sa Corominas Brother Bus Lines gikan sa dakbayan sa Sugbo nga nadisgrasya diha sa barangay Lutopan sa dakbayan sa Toledo.

Matud ni Canlapan nga gibana-banang 60 lang ka pasahero ang kapasidad sa maong bus apan base sa gidaghanon sa nakalas nga 15 ka tawo, ug 65 nga angol sobra-sobra gyud kini sa sitting capacity.

Sa interbyu kang assistant regional director sa Land Transportation and Franchising Regulatory Board nga si Edgar Catarungan sa DyAB niadtong milabay’ng gabii, nagduda kining nakaapekto sa performance sa brakes ang gidaghanon sa mga pasahero sa bus.

Ang drayber nga si Diosdado Requiso, 48, dihang gikahinabi sa Banat News niadtong milabay’ng gabii human sa hitabo miangkong puno ang iyang bus apan namik-ap siya diha sa dalan.

Gibutyag usab niyang gi-checkup usab niya ang kondisyon sa brake ug sa makina una pa siya mibiya sa terminal.

Mag-atubang si Requiso og kasong reckless imprudence resulting to multiple homicide, reckless imprudence resulting to physical injuries ug damage to property butyag pa ni Canlapan.

Si Requiso, taga barangay Libo, lungsod sa Tuburan nagtingkagol sa Toledo City detention cell dihang nahinabi sa Banat News niadtong Sabado sa gabii mibutyag nga wala na mokupot ang brake.

Matud pa niya human niya mabatyagi mi-malfunction ang brake nahuna-hunaan unta niyang ihagbong kini sa kanal left lane apan kalit niyang nasigpatan ang tulo ka nagsunod nga dump trucks nga iyang ikasugat hinungdan nga iyaha kining gibawi balik sa right lane ug gidiretso nalang niya sa maong kongkretong paril.

Ang mga namatay giila sa kapolisan nga sila si Alfredo Pasillas, 55, taga Asinan Bato, dakbayan sa Toledo, Flordeliz Benting, 37, taga Mohon, Colonia lungsod sa Tuburan ug ang anak niini ug sinagop nga sila si Cyril Benting, 10 ug Sian Vincent Bazarte, 5, Maximo Agsoy, 55, Caridad Tuburan, Romela Cabañero, 51, Cantuod, Balamban, Mary Jane Capacite, 20, barangay Gen. Climaco, Toledo, Teofilo Coligado, 49, Jagbuaya, Tuburan, Jose Bueno, 61, barangay Poblacion, Toledo, Danilyn Rosal, 10, Guinabasan, Asturias, Felicidad Arnebal, 61, Guinabasan, Asturias, Norberto Tejano, 40, taga Soong, dakbayan sa Lapu-Lapu, magtiayong Adonis ug Evelyan Garbansos nagpanuigon og 73-anyos ug 65, taga barangay Tisa, Labangon, dakbayan sa Sugbo apan dunay balay ngadto sa Santa Lucia Asturias ug Junave Vega, 22, taga Media Onse, Toledo.

Ang mga patay’ng lawas gidala diha sa Saint Francis Funeral Homes sa barangay Poblacion sa maong siyudad.

Si PO3 Julius Sanchez imbestigador sa maong hitabo mibutyag kagahapon sa Banat News nga gikan sa 48 nga nangaangol miabot na kini 65 ka tawo human nila masubay sa mga tambalanan sa Toledo District Hospital, Balamban District Hospital, South General Hospital sa dakbayan sa Naga ug sa mga tambalanan sa dakbayan sa Sugbo.

Si kanhi Bokal Ma.Victoria “Tata” Corominas gisuwayan sa pagtawag sa Banat News sa iyang cellphone aron makuhaan og pamahayag kabahin sa ilang lakang apan dili kini motubag.

Hinuon si Corominas namahayag sa The Freeman niadtong Sabado sa gabii nga ilahang atubangon ang responsibilidad, galastuhan sa hospital ug assistance sa mga nangamatay. – BANAT NEWS