CEBU, Philippines - Gipaabot nga tensyonado ang inaugural session sa Hunta Probinsyal ugmang adlawa (Lunes) diin gikatakdang magsunod sa pagpaabot sa ilang mga mensahe sa mga bag-ong napiling board members sila si Gob. Gwendolyn Garcia ug Bise Gob. Gregorio Sanchez Jr.
Nasayran nga sa naandang tradisyon, ang bise gobernador lang gyud unta ang mohatag sa inaugural address atol sa pagahimuong inaugural session tungod kay ang gobernador naandan nga mohatag sa unang pagbukas sa session sa Hunta Probinsyal pa kini mopadangat sa iyang mensahe.
Apan gibutyag ni Sanchez sa interbyu sa DyDD nga gitugutan niyang maka-deliver usab sa iyang pamahayag si Garcia atol sa inaugural session karung Lunes human seryosong mihangyu kaniya ang tanang mga board members nga kaalyado sa gobernador niadtong Biyernes.
Bugtong si Bokal Agnes Magpale nga nagpatambal lamang ang wala mohangyo kang Sanchez. Giangkon sab sa usa sa mga board members nga gisugo sila sa gobernador nga kumbinsihon si Sanchez nga tugotang makahatag sa mensahe atol sa maong kalihukan.
Matud ni Sanchez gibuak niya ang naandang tradisyon ug gihatagan niya og kahigayunan ang maong hangyo human usab misanong ang mga board members nga limitahan lang ang mensahe sa gobernador nga magsentro lang sa mga polisiya niini ug pamaagi sa pagdumala sa probinsya sa mosunod tulo ka tuig.
“Ok ra man ko, dili man ko gahi kaayo pakigsultihan. If its for the good of the province of Cebu, ok I'll allow her to deliver sa iyang message. Ato lang i-specific lang gyud iyang isulti, ang government program, project, policies and all the concern of the Sanguniang Panlalawigan,” sigon pa ni Sanchez sa lain usab nga interbyu sa DyRF.
Nasayran nga si Capitol Consultant on Information Atty. Rory Jon Sepulveda mitug-an nga ang i-deliver unya sa gobernadora nga inaugural speech magsentro 10 point agenda ug mga priority projects niini sama sa water system, environment, ecotourism ug uban nga nagkinahanglan og suporta gikan sa mga sakop sa hunta probinsiyal.
Mibahad si Sanchez nga mahitabo gyud ang kagubot kun supakon ug mangatake ngadto kaniya ang gobernador tungod kay dili usab siya magpanagana pag-deklarar nga ‘out of order’ na kini.
Sumala pa niini gipasaligan hinuon siya sa mga board members nga sagad sakop sa One Cebu Party ni Garcia nga mo-walkout sila kun lahi ang hisgutan sa gobernadora gawas sa 10 point agenda niini.
Mipasidaan si Sanchez nga silang mga opisyal nga motambong aduna gyuy mga suporter nga mosaksi sa himuong inaugural session.
Ang panagsungi tali ni Garcia ug Sanchez padayong nagkainit pipila ka bulan sa wala pa ang piniliay hangtud nga miabot ang eleksyon niadtong milabay’ng Mayo nga gani nag-atbang pa ang ilang mga partido.
Si Sanchez mibulgar sa mga gidudahang anomalosong transaksyon sa Kapitolyo, gikan sa overpricing sa katukoran sa Cebu International Convention Center, kontrobersyal nga pagkapalit sa Balili property karong bag-o mao ang gihulagway nga substandard nga asphalting project sa Kapitolyo nga mokantidad og P1.8 Bilyones. (BANATNEWS)