CEBU, Philippines - Tulo ka gatos ka punoan sa mga Marijuana ug 200 ka semilya niini ang gilarot sa mga sakop sa 78th Infantry Battalion inabagan sa mga barangay tanod sa Mantalungon lungsod sa Dalaguete.
Usa ka sibilyan ang mipahibalo sa mga sakop sa 78th IB kalabot sa plantation sa marijuana sa bukirong bahin sa maong barangay hinungdan nga gilusad ang operasyon inabagan sa barangay.
Sa pag-abot sa grupo sa maong dapit walay naabtang tawo o nag-ugmad sa maong mga plantasyon maong gipang-ibot nalang nila ang maong mga marijuana.
Matud pa sa Battalion Commander sa 78th IB nga si Raymundo Bañares nga ang gipahigayong operasyon usa ka leksyon ngadto sa mga planters og marijuana nga dili gyud nila sila lung-an hangtod masumpo ang pagsige og tanom niini.
Midugang si Bañares ila pa gyud karun nga gipangusgan ang pagpangampanya kalabot sa illegal nga drugas samtang mapasalamaton usab si Bañares ngadto sa concerned citizen nga naghatag og impormasyon ngadto kanila.
Kasamtangan karung nahimutang sa buhatan sa Philippine Drug Enforcement Agency ang mga marijuana ug seedlings nga ilang nahipos. Ang 78th IB inubanan sa buhatan sa PDEA-7 maoy nangusog karun sa pagpangampanya batok sa illegal nga drugas. (BANATNEWS)